”Мах импекс” хэрэглэгчээсээ 15 сая төгрөг нэхэмжилсэн байна

Хүнсний манлай үйлдвэр "Мах импекс" компанийн үйлдвэрлэсэн хиам муудаж дотроо ногоорч, хөгцөрсөн талаарх мэдээлэл олон нийтийн сүлжээгээр хамгийн анх цацагдсан. Нэгэн хэрэглэгч “Далай ээж” захаас тус компанийн үйлдвэрлэсэн хиамыг 10 дугаар сарын 15-ны өдөр худалдан авсан аж. Тэрбээр "Мах импэкс" компанийн “Нийслэл” хиамны муудсан зургийг авч фэйсбүүк хуудаснаа байрлуулжээ. Харин "Мах импэкс" тэрхүү зурагнаас болж бүтээгдэхүүний борлуулалт нь буурч 15 сая төгрөгний алдагдал хүлээсэн бөгөөд энэхүү хохиролыг хиам худалдаж авсан хэрэглэгчээс гаргуулахаар шүүхэд гомдол гаргасан байна.

Энэ бүхэнд Баянгол дүүргийн хэрэглэгч “Миний цахим хуудсанд байршуулсан зургийг найзууд минь шэйр хийсэн. Тэрийг зарим сайтууд мэдээ болгон тавьсан байсан. Миний тавьсан зургаар мэдээ бичсэн сайтууд надаас зөвшөөрөл авч холбогдоогүй. Гэтэл тэр мэдээллийн хариуцлагыг намайг хүлээж уучилал гуйж, залруулга хийх ёстой гэсэн нэхэмжлэлийг Баянгол дүүргийн шүүхэд өгсөн байна. Би үүнийг хүлээн зөвшөөрөхгүй байгаа. "Мах импэкс"  ийм хэрэг гарчихаад байхад надаас уучлалт гуйгаагүй” гэж ярьсан байна.