“Гоёл-2014” наадам эхэллээ

Манай улсад зохион байгуулагддаг загварын томоохон наадам болох "Гоёл" наадам өнөөдөр эхэллээ. Тус наадам өнөө жил 26 дахь удаагаа зохион байгуулагдаж байгаа бөгөөд энэ жилийн "Гоёл-2014" өнөөдөр загварын долоо хоногоор эхэлсэн байна. Тус наадмыг "Монголын дизайнеруудын холбоо", "Шилмэл загвар" компаниас зохион байгуулж байгаа аж. Уламжлал ёсоор загварын долоо хоногт "Гоёл-2014" наадамд оролцож буй дизайнер, загварын компаниуд коллекцио танилцуулах юм. "Дархан минж", "Master shoes","Мон үйл", дизайнер н.Нармандах, н.Долгормаа, "Bess tailor", "Lux cashmere" энэ сарын 26-нд буюу өнөөдөр загвараа танилцуулах бол 27-нд буюу маргааш "Говь-Эрдэнэ" компани, "Тогтуухай" хүүхдийн коллекц, дизайнер н.Цоггэрэл, н.Бадрах, н.Түвшинзаяа, н.Дөлгөөн нар бүтээлээ толилуулна.

Наадмын шилдгүүдийг шалгаруулах гала тоглолт энэ сарын 30-нд Соёлын төв өргөөнд болно. Наадамд "Монгол модель", "Шилмэл загвар", "Эра төв", "Азийн модель" агентлагийн 70 гаруй загвар өмсөгч оролцож байгаа юм байна.