Тоншуул: МИАТ-ийн луйварчдын сүүлчийн гүйлгээ 2009 оны тавдугаар сарын 4-нөөс өмнө хийгдсэн гэдэг нь худлаа...

Луйврын хэрэг зүсээ хэчнээн  хувиргаад ч, луйвар чигээрээ үлддэг гэдгийг МИАТ-ийн удирдлагуудад холбогдох хэргээс харж болно. Тэднийг мөнгө угаагаагүй болгон хувиргаж, ял зэмийг нь бууруулсан ч, даравч далдайна булавч бултайн гэдгийн үлгэрээр байгууллагын мөнгө шамшигдуулсан гэх үндэслэлээр буруутгасан. “Дайны эрсдлийн даатгал” нэрээр шамшигдуулсан мөнгөнийх нь ил мэдэгдэж байгаа хэмжээ 9.1 тэрбум. Цаашлаад хэрэгт холбогдогчдын болоод шамшигдуулсан мөнгөний тоо хэмжээ ч өсөх магадлал өндөр тухай эх сурвалжууд анх хэлж байсан. Тэгвэл “Тоншуул” би эдгээр хэрэгтнүүдийн ялыг хөнгөрүүлээд байгаа үндэслэл худлаа гэдгийг илтгэх баримтыг хүргэж байна.

Тэд яагаад мөнгө угаагчид биш  болон хувирсныг харвал 2009 оны тавдугаар сараас өмнөх Эрүүгийн хуулиар Мөнгө угаах гэмт хэргийн гол эх үүсвэр нь хар тамхи, зэвсгийн наймаанаас орж ирсэн байвал энэ төрлийн гэмт хэрэгт тооцож  болохоор хуульчилсан байсан бол 2009 оны тавдугаар сарын 4-нд хуульд өөрчлөлт орж Мөнгө угаах гэмт хэрэгт  татвараас бусад төрлийн эх үүсвэрээс олсон мөнгийг хамруулдаг болсонтой холбоотой гээд байгаа. Тэгээд МИАТ-ийн гэмтнүүдийн хувьд Дайны эрсдэлийн даатгал нэрээр гадаад руу мөнгө шилжүүлсэн 17 удаагийн үйлдлийн хамгийн сүүлчийн гүйлгээ нь 2009 оны тавдугаар сарын 4-нөөс өмнө хийгдсэн учраас тэд хуулийн өөрчлөлтийн үр шимээр ийнхүү мөнгө угаагчид биш болон хувирсан гэсэн билээ. Тэгвэл дор харагдаж буй хүснэгт МИАТ-ийн захирлуудын гадагш шилжүүлсэн төлбөрийн баримтууд юм. Огноог нь  харахад 2007 оны 2 дугаар сарын 28-наас 2010 оны 11 дүгээр сарын 29-н хүртэлх 16 удаагийн гүйлгээний жагсаалт байна.

Тэгэхээр хоёр шатны шүүхээс 10-13 жилийн ял сонсоод байсан МИАТ-ийн экс удирдлагуудын хэрэг  Улсын дээд шүүхээр ороод гарахдаа зүсээ хувиргасны цаана ихээхэн асуудал байгаа харагдаж байна.  “Дайны эрсдлийн даатгал” нэрээр мөнгө шамшигдуулсан энэ хэргийн эхлэл, өрнөл, төгсгөлийн хооронд МИАТ компанид 4 Гүйцэтгэх захирал, 10 Дэд захирал солигдсон байдаг ч, ял зэм сонсох дээрээ тулахад зургаахан хүний асуудал яригдсан. Түүнчлэн энэ хэрэгт холбогдогчдын цаана улстөр, эдийн засгийн бүлэглэлийн хэмжээнд яригдахуйц сүлжээ байгаа гэж яригдаж ирсэн харыг Дээд шүүхийн шийдвэр бүрэн батлаагүй ч, бүрэн лавшруулсан харагдсаны учир ч эндээс харагдаж байгааг хэлэх байна. Монголын урдаа барьдаг 20 өмгөөлөгчдийн  хүч хавсран ажилласан, өмгөөлөгчийн ур чадварыг харуулсан гэх хэргийн шийдвэр нь эцэстээ бүлэглэлийн нөлөөтэй байхыг үгүйсгэхэд эрт байна. Дээд шүүхийн шийдвэрийг үзэхэд хэрэгт холбогдогчдыг мөнгө угаагаагүй гээд байгаа. Гэтэл мөнгө угаасан гэдэг нь дээрх огноонуудаас харахад эрхбиш ойлгогдож байгаа биз ээ.

Тэгсэн ч Улсын дээд шүүх тэднийг мөнгө угаагаагүй гэж хүлээн зөвшөөрөөд байгууллагын мөнгө шамшигдуулсан гэх үндэслэлээр өмнөх хоёр шатны шүүхээс оноосон ялыг нь хөнгөрүүлж, Б.Эрдэнэбилэгт долоон жил, Ч.Хоролсүрэнд найман жил, Ц.Орхон, Б.Бат-Эрдэнэ, Голомт банкны VI салбарын захирлаар ажиллаж байсан Г.Саранчимэг нарт тус тус гурван жил хорих ял оноосон.  Харин Ч.Хоролсүрэнгийн дүү, “Монголиан Эйрлайнс” группын захирал асан Ч.Суурьтогтохын хэргийг хэрэгсэхгүй болгоод байгаа юм.

Гурван жилийн өмнөөс энэ хэргийн тухай баримт бүхий мэдээллүүд гарч, гэм буруутнуудад хариуцлага тооцож эхэлсэн нь өнгөрсөн жил. Гэхдээ тооцсон хариуцлага нь явцын дунд хүчээ алдаж, тэд өршөөгдөж байгаа нь Дээд шүүхийн шийдвэрээс харагдаж байна. Уг нь  энэ хэргийн ард МИАТ-ийн экс  удирдлагуудаас гадна Төрийн өмчийн хорооны нэр бүхий хүмүүс,  хуулийн байгууллагынхан гэхчлэн бүхэл бүтэн бүлэглэл байгааг, тэдний учруулсан хохирлын хэмжээ өсөн нэмэгдэхээр байгааг Ерөнхий Прокурор хэвлэлд ярьж байсан удаатай. Гэсэн ч одоо байж байгаа царай нь энэ.  “Дайны эрсдлийн даатгал” нэрээр мөнгө шамшигдуулсан энэ хэргийн эхлэл, өрнөл, төгсгөлийн хооронд МИАТ компанид 4 Гүйцэтгэх захирал, 10 Дэд захирал солигдсон байдаг. 2007-2010 оны хооронд залгамж алдалгүй хийгдсэн энэ луйврын хэргийг тэдгээр нөхдүүд огтоос мэдэхгүй байсан гэдэгт итгэхийн аргагүй юм. Түүнчлэн Улсын дээд шүүх МИАТ-ийн луйварчдын  хамгийн сүүлчийн гүйлгээг 2009 оны тавдугаар сарын 4-нөөс өмнө хийгдсэн гэдэг үндэслэлээр Мөнгө угаасан хэргийг нь хэрэгсэхгүй болгоод байгаа асуудлыг зүгээр өнгөрөөж болохгүй юм.

Тоншуул би энэ асуудлаар эргэн мэдээлэх болно.

Ноён Тоншуул