БӨӨС!!! Хүүхдүүдийн толгойноос гэрийн тэжээмэл амьтны бөөс илэрсэн гэв

Сүхбаатар дүүргийн IV хороонд байрлах 149 дүгээр цэцэрлэгийн дөрвөн хүүхдийн толгойноос аравдугаар сарын 05-ны өдөр бөөс илэрсэн байна. Энэ цэцэрлэгт бага, дунд, ахлах, бэлтгэл гэсэн дөрвөн бүлгийн 150 гаруй хүүхэд сургуулийн өмнөх боловсрол эзэмшиж байгаа аж. Цэцэрлэг одоогоор хэвийн үйл ажиллагаагаа явуулж байгаа  юм. Цэцэрлэг рүү ороход цэцэрлэгийн зүгээс хэд хэдэн хүүхдээс толгойны бөөс илэрч яаралтай арга хэмжээ авч ажиллалаа. Эцэг эхчүүд амралтын өдөр хүүхдээ гадуур дагуулж явахгүй,   өөрсдөө халдвар авах нөхцлийг бүрдүүлэхгүй сэрэмжтэй байхыг анхааруулж байна гэсэн зарлал хадсан байлаа. Энэ талаар тус 149 дүгээр цэцэрлэгийн эрхлэгч Т.Сувдаагаас тодрууллаа.

-Хэдэн хүүхдийн толгойноос бөөс илэрсэн бэ. Одоо ямар арга хэмжээ авч ажиллаж байна вэ?

-Манай цэцэрлэг дөрвөн бүлэгтэй. Аравдугаар сарын 05-нд дунд бүлэгт явдаг хүүхдийн толгойноос анх бөөс гарсан. Тэгээд бүх ангиуддаа хяналт шалгалт хийгээд яаралтай арга хэмжээ авч ажилласан. Анги танхимдаа  өдөрт гурван удаа цэвэрлэгээ хийж байгаа. Хүүхдийн цагаан хэрэглэл мөн хөнжлийг нь гадаа гаргаж тавьсан. Үнэхээр амьд амьтан байвал үхэхээр болсон. Тэгээд бид бүхэн арга хэмжээ аваад асуудалд намжсан юм. Би шимэгч амьтан судалдаг хүнээс асуухад гэрийн тэжээвэр амьтнаас гардаг бөөс байна гэсэн.

- Бөөс илэрсэн гэх  хүүхдүүд одоо цэцэрлэгтээ явж байгаа юу?

-Анх ахлах ангийн хүүхдийн толгойноос бөөс гарсан. Тэр хүүхэдтэй ойр байдаг хүүхдүүдэд мөн шалгалт хийсэн. Анх бөөс илэрсэн хүүхдийн эгч нь манай бэлтгэл бүлэгт сурдаг юм. Бэлтгэл ангиас гурван хүүхдийн толгойноос тийм амьтан гарч ирсэн. Тэр гурван хүүхдийн толгойноос гурван ширхэг бөөс, нэг хуурс гарч ирсэн. Тэр дөрвөн хүүхдүүдээс нэг хүүхэд нь цэцэрлэгтээ явахгүй байгаа. Бусад нь бүгд хичээлдээ явж байна.   

 -Дүүрэг болон өрхийн эмнэлэгт хандаж хүүхдүүдэд үзлэг хийсэн үү?

-Үгүй. Тэр үед бид бүхэн сандраад ямар нэгэн байгууллагад хандаагүй. Манай ээж эрүүл ахуй ч хүн. Хамгийн түрүүн ээж рүүгээ утасдаж зөвлөгөө авсан. Арцны хандаар угаадаг дараа нь хулсан шүүрээр шүүрддэг гэсний дагуу ажилласан. Хэрвээ энэ асуудал цаашаа даамжраад явсан бол хаана хандах вэ гэдэг асуудал гарч ирэх байсан.

-Эрүүл мэндийн байгууллагад хандаагүй учраас дахиад бөөс илрэх магадлал байгаа юм бишүү. Урьдчилан сэргийлэх тал дээр хэрхэн анхаарч ажиллаж байна вэ?

-Энэ нь амьтны гаралтай бөөс гаднаас л орж ирсэн. Одоо тэрнээс хойш сар гаруй хугацаа боллоо. Энэ хугацаанд ахиад бөөс илрээгүй. Бид бүхэн өглөө болгон хүүхдүүдээ шалгаж байна, энэ бидний үндсэн ажил болчихоод байна. Дахиад ийм асуудал гарвал Халдвар судлалын үндэсний төв мөн, дүүргийн эрүүл мэндийн нэгдэл, хорооны эмнэлэгт хандах ёстой юм билээ.

-Та тэр хүүхдийн толгойноос гэрийн тэжээмэл амьтны бөөс илэрсэн гэж хэллээ. Эцэг эхтэй уулзсан уу. Яг ямар амьтан тэжээдэг байсан вэ?

-Муур тэжээдэг байсан юм билээ. Ээж аав нь муураа байнга эмчид үзүүлдэг л гэж байсан. Энэ асуудал сарын өмнө болоод бид бүхэн арга хэмжээ авч ажиллаад өнгөрсөн асуудал. Гэтэл Фэйсбүүк хуудаснаа гэртээ суудаг ээжүүд хоорондоо сэтгэгдэлээ бичдэг групп дээр манай цэцэрлэгт болсон асуудлын талаар бичсэн байсныг сэтгүүлч нар олж уншсан байна. Сэтгүүлчдийн бичиж байгаагаар манай цэцэрлэг нь дийлдэхийн аргагүй бясаатай, хүүхдүүд нь бүгд бөөстэй гээд бичсэн байсан. Сэтгүүлч хүн гэдэг чинь ёс зүйтэй байх хэрэгтэй. Энэ асуудлын ард байгууллагын нэр хүнд болон энэд ажилладаг өчнөөн хүний хөдөлмөрийг үгүй хийж байна. Манай байгууллагад ямар ч амьтан үржих нөхцөл байхгүй, байнга ариутгаж угаадаг.

Ер нь эцэг эхчүүд хэрхэн хүлээж авсан вэ. Бүх хүүхэд цэцэрлэгтээ хэвийн  явж байна уу?

-Тухайн үед бүх эцэг эхчүүдэд хэлсэн. Ийм асуудал гарсан учраас эцэг эхийн зүгээс хүүхэддээ анхаарал хандуулах, мөн цэцэрлэгийн зүгээс ариун цэврийг сайн сахих хэрэгтэй гэж хэлсэн. Дөрвөн бүлэгтэй цэцэрлэгт эмчийн орон тоо байдаггүй нь хүндрэл үүсдэг. Манай цэцэрлэгийн хүүхдүүд ханиад хүрэх наад зах нь биеэр нь юм туурсан үед би өөрөө эцэг эхтэй нь уулзаж ярилцаж арга хэмжээ авдаг. 

Б.Анхаа