ШШГА- ны ажилтаныг хөнөөсөн сэжигтэн амиа хорлосон байжээ

ХОЁР ХҮНИЙГ БУУДАЖ, ХӨНӨӨГӨӨД ӨӨРИЙНХӨӨ АМИЙГ ЕГҮҮТГЭЖЭЭ-

Сүхбаатар аймгийн Мөнх­хаан сумын Баянтэрэм  багийн нутаг дэвсгэрт  хүн амины ноцтой хэрэг энэ сарын 1-ний өдрийн 16 цагийн үед гарчээ. Тус багийн малчин Б.Эрдэнэ­сүхийн хотонд хоёр шийдвэр гүйцэтгэгч, төлбөр авагч тал болох салсан эхнэр Д.Отгон­заяа нарын хүмүүс очжээ. Тэднийг очиход Б.Эрдэнэ­сүх малдаа явсан эзгүй байсан гэнэ. Хэсэг хуга­цаа­ны дараа  хот айлынх нь хүнээр "шүүхийн шийдвэрийн дагуу 88 толгой мал Б.Эрдэнэ­сүхээс авч түүний салсан эхнэр Д.Отгонзаяад   хүүхдийн тэтгэлэг болгон өгөх шүүхийн шийдвэрийг гүйцэт­гэж яваа хүмүүс гэрт чинь ирсэн байна" гэж хэлүүлжээ. Удалгүй Б.Эрдэнэсүх морь­той ирж "Хүүхдийн тэтгэлэг болгож 88 толгой мал өгч чадахгүй" хэмээн "ТОЗ-8" маркийн буу гаргаж ирсэн аж.

Шүүхийн шийдвэр гүйцэт­гэгч нар "Өнгөрсөн арав­дугаар сарын 22-ны өдрийн 530 тоот  Сүхбаатар аймгийн Сум дундын шүүхээс гарга­сан иргэний шийдвэрийг болон­ 320 дугаартай гүйцэт­гэх хуудсаа үзүүлж, шийдвэр гүйцэтгэлийн ажиллагаа явуулж байна гэдгээ  албан ёсоор мэдэгдэж, ахлах шийд­вэр гүйцэтгэгч ахмад Ц.Аваа­сүрэн шийдвэр гүйцэтгэгч В.Сүхбат нар хэмээн өөрс­дий­гөө танилцуулсан байна. Б.Эрдэнэсүх тэдний яриаг үл хайхран "Мал өгөхгүй, зайлц­гаа" хэмээн  шийдвэр гүйцэт­гэгч В.Сүхбатыг буудаж амь насыг нь хохироосон байна. Мөн тухайн үед хамт явсан төлбөр авагч талын таван хүн дээр очин иргэн Д. Батсайха­ныг буудан амь насыг нь хохироож, иргэн н.Батсүхийн мөрөн тус газарт нь буудан шархдуулжээ. Үүнийхээ дараа тэрбээр  морь унан хэргийн газраас оргон зугт­сан аж. Иргэн Батсүх нь  эхнэ­рийх нь талын хамаатан  бөгөөд түүнийг  Мөнххаан сумын эмнэлэгт яаралтай хүргэж анхны тусламж үзүүл­жээ. Сүхбаатар аймгийн цаг­даа­гийн газар болон Шүү­хийн шийдвэр гүйцэтгэх бай­гуул­лагын албан хаагчдын хамтарсан эрлийн баг гарч  бусдын амийг бүрэлгэсэн сэжигтэн Б.Эрдэнэсүхийг эрэн сурвалжилсны эцэст өчигдөр 14 цагийн үед олсон байна.

Энэ талаар Мөнххаан сумын Цагдаагийн тас­гийн дарга  хошууч Б.Бат-Өлзийгөөс зарим нэгэн зүйлийг тодрууллаа.

-Шүүхийн шийдвэр гүй­цэт­гэгчийн амийг хөнөөсөн Б.Эрдэнэсүхийг олсон гэж сонслоо?

-Энэ хэрэг  өнгөрсөн ням гаригт гарсан. Хоёр хүнийг буудаж, амь насыг нь хөнөө­гөөд сэжигтэн оргон зайллаа  гэх мэдээллээр аймгийн болон манай тасгаас эрлийн баг гарч ажилласан. Сэжиг­тэн Б.Эрдэнэсүхийн цогцсыг өчигдөр өдөр буюу энэ сарын 2-ны өдөр Баянтэрмэн уул­наас олсон. Тэрбээр амиа хорлосон бололтой.

-Сэжигтэн сэжиглэн  хэр­гийн газраас оргон зугт­сан гэсэн. Бусдыг буудсан буу нь өөрийнх нь байсан юм болов уу?

-Энэ хэрэгт мөрдөн бай­цаал­тын үйл ажиллагаа хийж дөнгөж эхэлж байна. Сэжиг­тэн хэний буутай явсан амиа тэр буугаар хөнөөсөн үү гэдгийг одоогоор хэлэхэд эрт байна. Юутай ч хоёр гурван хэсэг болж бид сэжигтнийг эрэн сурвалжилсан. Даваа гари­гийн өдөр сэжигтний цогцсыг оллоо хэмээн бидэнд мэдэгд­сэн учир бид эрлийн ажлаа зогсоогоод сая суман дээрээ ирээд байна.

-Талийгаачийн цогцос олддог газраас түүний амь­дарч байсан баг хэр хол байдаг юм бэ?

-Баянтэрэм багаас Баян­тэрэм уул арав гаруй км зай­тай. Сэжигтэн оргож яваад энэ ууланд хүрсэн бололтой. Тэнд очоод өөрийнхөө амийг хөнөөсөн байх гэж урьдчил­сан байдлаар таамаглаж байна.

-Нутаг орных нь зарим хүнтэй утсаар холбогдоход  талийгаач эхнэрээ их зовоо­дог байсан. Сэтгэцийн жаахан өөрчлөлттэй бай­сан гэж ярьж байна. Хүнийхээ хувьд ямархуу хүн байсан юм бол?

-Энэ талаар би мэдэхгүй байна гэв.

 Нутгийн зарим иргэдийн хэлснээр талийгаач их хар­тай, эхнэрээ зоддог байсан гэнэ.  Ойр зуур гэрээсээ гарах­даа эхнэрээ хүлж, хүлээсийг нь  гэрийнхээ хаяагаар гарган бэхэлдэг байсан тухай ярьж байв. Талийгаачийн энэ  зүй бус авирыг тэвчилгүй тэрбээр хүүхдээ аван салсан аж. Салж байгаа учир иргэний  журмаар хүүхдэд нь тэтгэмж болгож 88 толгой мал гаргуу­лах болсон нь  талийгаачид хүнд цохилт болсон болол­той. Эх сурвалжийн мэдээлж буйгаар  талийгаач ууланд хоолойгоо боомилсон бай­дал­тай олджээ.

 Г.ОНОН