Гэрлийн тусгалаас болж орон нутагт замын осол их гарч байна

Автотээврийн үндэсний төв, Сонгинохайрхан дүүргийн Засаг даргын тамгын газар, Нийслэлийн иргэдийн хурлын төлөөлөгч Т.Болдбаатарын санаачлагаар Сонгинохайрхан дүүргийн нутаг дэвсгэрийн Драгон төв буюу Сонгинохайрхан автовокзалын гаднах талбайн орчинг сайжруулахаар холбогдох байгууллагууд хамтран "Хяналт, шалгалт зохион байгуулах тухай" Засаг даргын 450 тоот захирамжийг 2013 оны 11 дүгээр сарын 13-ны өдөр гаргуулан, үүний дагуу төрийн захиргааны байгууллагууд хамтран ажиллаж байгаа аж.

Баруун болон хойд чиглэл, төвийн аймаг руу зорчих нийтийн тээврийн үйлчилгээг явуулж буй Автовокзалыг дагаад хууль бус худалдаа, гар дээрх наймаа, хулгайн тээврийн асуудал ихээр гарах болсон байна. Тодруулбал, СХД-т байрлах тус автовокзалын гадна гар дээрээс хууль бусаар бууны сум, хориотой ангийн мах худалдаалах явдал газар авчээ.    

Мөн нийтийн тээвэр эрхлэх тээвэрлэлтийн гэрээгүй тээврийн хэрэгслүүд зорчигч тээвэрлэх явдал гарч байгаа учир Сонгинохайрхан дүүргийн Засаг дарга, Зам тээврийн яамны харьяа Автотээврийн үндэсний төвөөс хамтран энэ асуудлыг цэгцлэхээр ажиллаж байна.

Мөн жолооч бүр өөрийн сонирхолдоо нийцүүлэн төрөл бүрийн тусгалтай гэрлийг автомашиндаа тавьж байгаа нь осол аваар буурахгүй байх нэг үзүүлэлт болжээ. Орон нутгийн замд гарч байгаа ослын дийлэнх хувь нь гэрлийн тусгалтай холбоотой байдаг гэж Замын цагдаагийн газраас мэдээллээ.