Олонлог сургууль дээр охид зодолдсон хэрэг гарсан VS зодолдоогүй илсэн

Өчигдөр  “Олонлог”  дунд  сургууль дээр ахлах ангийн охидууд зодолдсон хэрэг гарсан байна. Уг хэргийн дуудлага  оройны 22:30 цагт Чингэлтэй дүүргийн цагдаагийн хэлтэст иржээ. Энэ хэргийн талаар Чингэлтэй дүүргийн цагдаагийн хэлтэсийн Хошууч  н. Гүнчин- Иш ээс зарим зүйлийг тодрууллаа.

-          Өчигдөр "Олонлог" сургууль дээр хүүхдүүд зодолдсон хэрэг гарсан байна. Энэ хэргийг танай хэлтэст шалгаж байгаа юу?

-          Тийм ээ  “Олонлог” сургууль  дээр эмэгтэй хүүхдүүд зодолдсон гэдэг дуудлагын дагуу шалгаж байна.

-          Юунаас болж зодоон үүссэн юм бэ?

-          Хүүхдүүдийн үл  ойлголцол, маргаанаас болсон байна.

-          Хэддүгээр ангийн хүүхдүүд юм бэ?

-          10,11 дүгээр ангийн охидууд .

-          Хүнд гэмтээсэн юм уу тэр охин нь ухаан алдсан байсан уу?

-          Хэргийг шалгаж байгаа болохоор тодорхой мэдээлэл өгөх боломжгүй байна гэсэн юм.

Мөн энэ хэргийн талаар "Олонлог"  дунд сургуулийн нийгмийн ажилтан Ж.Норжмаагаас тодрууллаа.

-          Танай сургууль дээр охидууд зодолдсон  хэрэг гарчээ?

-          Үгүй наадах чинь ёстой худлаа мэдээлэл. Тийм юм болоогүй. Манай сургуулийн нэр хүндэд халдах гэж санатайгаар  ингэж мэдээлсэн байна билээ.

-          Чингэлтэй дүүргийн цагдаагийн хэлтэсээс тодруулахад Ийм хэрэг гарсан. Энэ хэргийг шалгаж байна гэсэн мэдээлэл өгсөн л дөө?

-          Харин ийм дуудлага өгсөн байна.  Яахав эцэг эх нь андуураад учрыг нь сайн олоогүй дуудлага өгсөн юм байна билээ. Энэ асуудлаар өнөөдөр  манай сургуулийн удирдлагууд хуралдлаа. Зодуулсан гэх Э охины ээжтэй ч ярьсан.  Хүүхдүүд бол зодолдоогүй.

- Тэгээд зодолдоогүй байхад яагаад дуудлага өгсөн юм бол. Ухаан алдсан байсан уу?

Тэр охин жаахан бие султай юм тэгээд унтаж байхад нь л босоо ч гээд бусад нь илсэн юм байна билээ. Учрыг сайн олоогүй цагдаад  дуудлага өгсөн байна.

-          Энэ буруу ташаа мэдээлэл гэж та нар цагдаад хандсан уу?

-          Үгүй цагдаад хандаагүй. Одоо тэр охины ээж нь өөрөө цагдаагийн хэлтэст очиж уулзаад учрыг хэлж тэр хэргийг хаалгачихна гэсэн. Бид ч бас нэр төрөө сэргээлгэмээр байна. Худлаа гэвэл чи ээжтэй нь ярь. Гээд  Э гэдэг охины ээж гэж 9901... тэй дугаартай утас өгсөн юм. Энэ утасруу хэд хэдэн удаа залгасан боловч утсаа авсангүй ээ.

Энэ талаар эргэн мэдээлэх болно.

Н.Ганчимэг