Малайзын эмч нар талийгаач эмэгтэйн задлангийн дүрс бичлэгийг устгажээ

Харь оронд амиа алдсан монголчуудын хэрэг тэгсхийгээд замхарсан олон тохиолдол байдаг. Хамгийн сүүлд Малайз улсад хүний наймаа гэх тодотголтойгоор амиа алдсан цэл залуухан бүсгүйн хэрэг олны сэтгэлийг сэртхийлгээд байгаа. Түүнийг эрхтэний наймааны золиос болсон эсэхийг мэдэхээр мэргэжлийн шинжээчдийн баг тус улсыг зориод байгаа билээ.

Газар дээр хэргийн байдалтай очиж танилцсан хүмүүс талийгаачийн цогцост зөвшөөрөлгүй задлан хийсэн гэдгийг нотлож байна. Энэ Малайзын цагдаагийн газар бидэнд худлаа мэдээлэл өгсөн гэсэн үг юм. Задлан хийсэн эмчээс нь  дүрс бичлэгийг үзэх хүсэлт тавихад тодорхой хэмжээний мөнгө төлж байж Гадаад хэргийн яамнаас ав гэсэн хариу өгчээ. Мөн дүрс бичлэг шаардлага хангаагүй учир бид устгасан гэжээ. Шүүх эмнэлгийн дүгнэлт гараагүй, мөрдөн байцаалт дуусаагүй байхад талийгаачийн үхлийн шалтгааныг хэлэхгүй хэмээн цааргалаж байгаа тухай “Өдрийн сонин”-д нийтэлжээ.

Бехраны эмнэлэгт задлан хийсэн бөгөөд бөгөөд тус эмнэлэгтэй шилжүүлэлгүй хадгалж байж. Ийнхүү дүрс бичлэг зэрэг хөдлөшгүй баримтыг устгасан нь уг хэргийн цаана ямар нэг юм байна гэдгийг нотолж буй хэрэг юм. Ямартай ч задлан хийсэн эмч бүх эрхтэн нь бүрэн гэдэг хариуг ар гэрийнхэнд нь өгсөн байна.

Талийгаач 165 см өндөртэй, боомилж амиа егүүтгэсэн гээд байгаа төмөр нь ердөө 90 см аж. Ингэхээр бас нэг эргэлзээ төрнө. Мөн бүсгүйг бусдад харгислуулж амиа алдсан гэж ах нь дүгнэж байгаа аж. Тодруулбал талийгаачийн хоёр хөлний ар талын булчин дээр хадаас эсвэл ямар нэг үзүүртэй зүйлээр цохисон бололтой гурав, гурван нүх байж. Хэргийн газар шар өнгийн бариултай хайч байсан нь гарыг нь хутгаар биш хайчаар битүү зүссэн байх гэсэн таамаг түрүүлж байгаа аж. Хэрэгтнүүд талийгаачийг амиа егүүтгэсэн мэт харагдуулахын тулд хүзүүгээр нь уяа, өвдөг сөхрүүлэхээр араас нь үзүүртэй юмаар хатгаж цохисон байж болох аж. Эрүүнийх нь доод талд боомилсон гэх мөр үлдэж цус хурсан байсан бөгөөд тэд яргалсныхаа дараагаар амиа хорлосон мэт харагдуулах гэж оролдсоны шинж.

Ямартай ч монгол хүнийг хилийн чанадад эзэнгүй мэт ийнхүү амь насанд нь халддаг байдал дахиж битгий гараасаа, тэд араас нэхэх төр, гэр бүл байдаг. Мөн Монголын цагдаагийн байгууллага хүнийхээ амийг нэхэж хэрэгтэнд хариуцлага хүлээлгэж чаддаг гэдгийг хараасай хэмээн тэд Малайзыг зорьсон. Одоогоор ах нь миний дүүгийн эд эрхтэнг бүтэн гэсэн тиймээс 49 хоногоос нь өмнө дахиж зүсэж зовоолгүй чандарлая, тэгэхгүй бол сүнс нь төрлөө олохгүй төөрдөг юм гэнэ лээ хэмээж байгаа аж.