Тэтгэврийн нэмэгдлийг 2015 оны нэгдүгээр сараас олгоно

Монгол Улсын хэмжээнд 494800 иргэн ажилласан жил, тэтгэврийн даатгалын шимтгэлээ нөхөн тооцуулах хүсэлтийг гаргасан байна. Тэдгээрийн 24 хувь нь тав хүртэлх жилээр, 76 хувь нь 5-11 жилээр ажилласан хугацаагаа нэмэгдүүлэх боломжтой гэнэ. 1991-1994 онуудад дөрөв ба түүнээс дээш хүүхэдтэй эхчүүд болон улсад 27 жил ажилласан эмэгтэйчүүд, 32 жил ажилласан эрчүүдийг нас харгалзахгүйгээр тэтгэвэрт гаргаж байсан билээ. Энэ 41 мянган иргэний 82 хувийг эмэгтэйчүүд эзлэж байгаа бөгөөд тэдэнд ажилласан хугацааг нь нөхөн тооцох бүртгэл, судалгааны ажлыг ирэх оны хоёрдугаар сарын 01-нээс эхлүүлж, иргэн бүрээр ажилласан хугацааны нэмэгдлийг баталгаажуулалт хийсний дараа 2015 оны нэгдүгээр сарын 01-нээс эхлэн иргэдэд олгохоор болжээ.