”Макс”-ын ослын хариуцлагыг жирийн ажилчинд үүрүүлээд орхих нь

“Макс”-ын барилга дээр болсон ослын хэргийг хэн хариуцах вэ. Осол гарсан нь угаасаа дуулиан, түүн дээр нэмээд засаг төр, дарга нарын булхай луйврын талаар бүгд ярьцгаасан ч хуулийн хариуцлагыг хэн хүлээх вэ гэдэг дээр таг чиг.

Хэрэг гарсны дараахан барилгын хятад ажилчдыг микро автобусанд суулгаад авч одсон. Одоо барилгын гүйцэтгэгч “Мээж гласс” компанийн захирал Ш.Нямдаваа, хөдөлмөр хамгаалал, аюулгүй ажиллагааны инженер Л.Амгалан нарыг хориод байгаа.

Тэгэхээр ослын хариуцлага төмөр унагаасан ажилчин, захирал, инженер гурвын нуруун дээр бууна гэсэн үг үү. Энэ газрын наймаанд оролцсон лоббичид, явган хүний зам ч үлдээхгүй шахам барилга босгох зөвшөөрөл өгсөн албан тушаалтан, осол болоход эрсдэл гарах нь тодорхой байхад барилга үргэлжлүүлэх зөвшөөрөл өгсөн эрх мэдэлтнүүд хариуцлагын гадна үлдэх нь.

“Макс” Ганбаатар лав гадаадаас ирээгүй байгаа. БХБЯ-наас энэ асуудалд хариулт өгөхдөө, ажилчин, аюулгүй инженерийн хариуцлагагүйтай холбоотой ухааны юм ярьсан.

Тэгвэл барилга дээр техникийн осол хэзээ ч гарч болно. Тоосго унах, шил бутрах, шат нурах гээд. Гэхдээ эдгээр осол барилгын талбайдаа гарч, хашаан дотроо л үлдэх ёстой. Мэдээж буруутан нь зохих хариуцлагаа хүлээнэ. Харин барилгын газрыг булхайтай наймаагаар авч, барилгын талбайгаас гадуурх амьдралд хал балтай зөвшөөрөл олгогдож, дээрээс унасан төмөр нь барилгын хашаанд бус гудамжаар явсан зорчигчийн дээрээс унаж амийг нь бүрэлгэх аваас хариуцлагыг нь бүх шатны авлигачид үүрэх ёстой.

Монголын төр, Монголын шүүх, Монголын хууль хэнд үйлчлэхийг энэ ослоос харж, дүгнэх л үлдлээ.

Д.Маргад