Маргааш дахин төлөвлөлтийн санал хураалт болно

УИХ-ын хаврын чуулганаар “Улаанбаатар хотыг 2030 он хүртэл хөгжүүлэх хөгжлийн хөтөлбөр”-ийг баталсан. Нийслэлийн Засаг даргын 2013-2016 оны мөрийн хөтөлбөрт тусгасны дагуу нийслэлийн ИТХ-ын 2013 оны 7/29, 12/43 тогтоолоор “Гэр хорооллын дахин төлөвлөлт”-ийн төслийн 2-р ээлжийн найман байршилд төсөл хэрэгжүүлэхээр болсон юм. Төслийг хэрэгжүүлэхээр 21 компани 31 санал ирүүлжээ.

Нийслэлийн Засаг даргын А/164 тоот захирамжаар батлагдсан ажлын хэсэг санал тус бүрийг үнэлэн, “Гэр хорооллын дахин төлөвлөлтийн үйл ажиллагааны журам”-ын дагуу эхний шалгуурыг хангасан 12 компанийг шалгаруулжээ. Эдгээр 12 компаниас иргэдээс санал авч, эцсийн байдлаар Гэр хорооллын дахин төлөвлөлтийн төсөл хэрэгжүүлэгчийг шалгаруулна. Санал авах ажиллагааг маргааш 09:00-19:00 цагийн хооронд зохион байгуулах гэж байна.