Нас барсан хүний нэрээр их хэмжээний мөнгө завшсан төрийн албан хаагчдыг хорилоо

-НАС БАРСАН, ШИЛЖСЭН ХҮМҮҮСИЙН НЭРээр ХУУРАМЧ БИЧИГ БАРИМТ БҮРДҮҮЛЭН МӨНГӨ ЗАВШЖЭЭ-

Эрүүгийн цагдаагийн Эдийн засгийн гэмт хэрэгтэй тэмцэх хэлтэс, УМБГ-ын Эдийн засгийн гэмт хэрэг мөрдөх хэлтсийн ажилтнууд хамтран өнгөрсөн сарын сүүлчээр Баян-Өлгий аймагт ажиллаж, хуурамч баримт ашиглан мөнгө завшдаг байсан төрийн албан тушаалтнуудыг шалгаж, эрүүгийн хэрэг үүсгэсэн байна. Уг хэрэгт холбогдуулж тус аймгийн Нийгмийн халамж, үйлчилгээний хэлтсийн дарга асан Съезд, тус хэлтсийн ажилтан Хайролмажит нарын дөрөв, “Хадгаламж”, “Хаан”, “Төрийн банк”-ны теллер нийлсэн найм, нийт 12 хүнийг өнгөрсөн долоо хоногт саатуулсан байна. Эх сурвалжийн мэдээлснээр тэдний дээр дахин таван хүн нэмэгдэж болзошгүй бөгөөд тэднийг Баян-Өлгий аймагт одоогоор шалгаж байгаа юм байна.

Монгол Улсын харьяатаас гарсан хүмүүсийн нэрээр “Эх орны хишиг”-ийн 1.5 сая төгрөг, 70, 50, 21 мянган төгрөг, нас барсан хүнийг амьд мэтээр бичиг баримт бүрдүүлж, тэтгэвэр өгсөн гээд Нийгмийн халамжийн сангаас олгодог халамжийг хуурамч бичиг баримт бүрдүүлж, завшиж байсан хэрэгт тэднийг буруутгаад байгаа юм. Хохирлын хэмжээг хараахан тогтоогоогүй ч урьдчилсан байдлаар 500 сая төгрөг хол давна гэдгийг эх сурвалж хэллээ. Баян-Өлгий аймгийн казах иргэд Казахстан улсын харьяат болж, Монгол Улсын харьяатаас гардаг. Ийм хүмүүсийн баримт материалыг шүүж, дээрх хүмүүс Монгол Улсын харьяалалгүй хүний бичиг баримтыг хуурамчаар үйлдэж байсан нь шалгалтаар тогтоогдоод байгаа гэнэ. Монгол Улсын Ерөнхийлөгчийн сонгуулийн өмнө манай улсын харьяатаас гарсан Баян-Өлгий аймгийн 20-иод мянган иргэн харьяаллаа сэргээлгэх хүсэлт тавьжээ. Сэжигтнүүд дээрх хүмүүсийн цөөнгүй хэсгийнх нь нэрийг ашигласан гэж бодвол 500 сая төгрөгөөс ч илүү хэмжээгээр улсын эдийн засаг хохирсон байх магадлалтай байна.

Хэрэгт холбогдсон 12 хүнийг нийслэл рүү хүргэхээр орон нутгийн цагдаагийн байгууллагын ажилтнууд тус аймгаас гарах үед сэжигтнүүдийн ар гэрийнхэн аймгийнхаа шүүх, прокурорын байгууллагын үүдэнд эсэргүүцэл илэрхийлж, жагссан байна. Тэд “Хот руу явуулахгүй, Баян-Өлгийнхөө хууль хяналтын байгууллагынхнаар шалгуулъя” хэмээж байжээ. Уг жагсаал цуглааныг сэжигтэн Съездийн эхнэр, Хайролмажитын ах тус аймгийн МАН-ын эрх бүхий албан тушаалтан Галамхан зэрэг хүмүүс зохион байгуулсан гэнэ. Съездийн хувьд өмнө нь хууль хяналтын байгууллагаар удаа дараа шалгуулж байсан. Ирэх замдаа бусдадаа ямар тайлбар мэдүүлэг өгөх талаар үг зааварласан гэх мэдээлэл ч байна.