Н.Оргил:Төрийн албыг төрлийн алба болгодог бүхэл бүтэн баг ССАЖЯ-нд ажилладаг

ССАЖЯ-ны Соёл урлагийн бодлогын хэрэгжилтийг зохицуулах газрын дарга Н.Оргилтой холбоотой элдэв мэдээллүүд гараад байсан. Түүнийг төсвийн мөнгөнөөс хувьдаа завшсан. Үүнээс нь болоод ажлаас нь халжээ гэх мэт мэдээллүүд хэвлэлээр бичигдсэн. Энэ талаар Н.Оргил "Би өөрийн хүсэлтээр ажлаа өгч байгаа. ССАЖЯ-нд жил хагас ажиллалаа. Монголчууд идэж байсан тогоо руугаа нулимдаггүй гэдэг. Гэхдээ хууль бус, ёс бус зүйлтэй эвлэрмээргүй байна. Төрийн албыг төрлийн алба болгодог бүхэл бүтэн баг, механизм тэнд ажилладаг юм байна. Би гэдэг хүн энэ том асуудалтай ганцаараа үзэлцээд дийлэхгүй юм байна. Газрын дарга бол салбараа мэддэг хүн байх ёстой. Гэтэл газрын даргын ажлыг хүчээр унагаадаг, ингэхдээ мэргэжлийн бус хүмүүс ажилд оруулж ирж байна. Ийм асуудалтай цаашид эвлэрч ажиллаж чадахгүй. Би соёл урлагийн төлөө сайн юм хийж, чанартай бүтээл туурвин, шударга ажиллая гэж бодож яаманд ирсэн. Би танил тал, арын хаалга гэдэг зүйлээс хол хүн. Намайг хэвлэл дээр авлига авч баяжаад байгаа юм шиг бичсэн. Надад авлига авах шаардлага байхгүй" гэж ярьжээ.