Сочид байгаа монгол тамирчид хэвийн боов идлээ гэж нутаг нэгтнүүд нь дамшиглав

Спортод элэгтэй монголчууд Олимпийн аваргатай болсноосоо хойш олон улсын тэмцээн уралдааныг их л додигор суун үздэг болсон. Н.Түвшинбаяр аваргыг төрийн тэргүүнээс дутахааргүй хүндэтгэж урам, хайраар дутаалгүй байсан нь дараа, дараагийн амжилтанд нь том нөлөө болсон тухай аварга өөрөө ч хэлдэг. Жудо бөхийг дэмнэж, дэмжих төрийн түшээ байдаг нь монголын жүдочдод  дэлхийд өнгөлөх боломжийг олгоод зогсохгүй итгэлийг төрүүлж байгаа.

Гэтэл Сочид болох гэж байгаа өвлийн Олимпод оролцохоор явсан тамирчдаа элэглэж, шоолоод бөөн маазрал үүсгэснийг нь хараад гайхав. Өнөө өглөө твиттер, фейсбүүк, нэр бүхий сайтуудаар Олимпод оролцохоор явсан тамирчид ул боов идсэн, зүг мөрөө гаргасан зэргийг нь хошин шог үзсэн аятай шоолж дамшиглажээ.

Бүр тодруулбал олныг дагуулагч овилгоггүй жиргээч Танхай эмээ:

“Амжилт гаргахгүй юм чинь гээд

Ад үзсэн янзтай л хувцас өмсүүлж

Бензинээ дуустал уралдаарай

Бид сэтгэлээрээ дэмжэнэ ээ” хэмээн шүлэглэжээ. Амны бэлэгээс ашдын бэлэгээ бодолцдог монгол түмэнд угаас амжилт гаргахгүй гэдгийг тодотгон хэлсэн таалагдах нь юу л бол.

Мөн цахим сайтууд  “Сочи-г зорьсон Монголын багийнхан хөглөсөөр” гэх нийтлэл хүртэл бичсэн байх юм. Хөглөсөн гэдэг тодотгол нь өвлийн олимпод оролцож байгаа тамирчиддаа Цанын холбооны ерөнхийлөгч Р.Раш гуай  золгохоор очихдоо сар шинийн хэвийн боов амсуулахаар аваачсан ч хамгаалалт нь оруулахгүй болохоор печень мэтээр ойлгуулж сэргэлэн зан гарган хэдэн хүүхэддээ үндэсний баяр ёслолын идээнээсээ хүртээсэн явдал аж.

Дэлхийн тавцанд эх орныхоо нэрийг гаргана гэж итгээд явж байгаа тамирчид, Цагаан сарын баяраас хүртэлцэх ёсгүй юм уу. Монгол хүн хүндэт зочин, гэрийн эзэн, хол явсан хайртай хүмүүстээ идээний дээжээсээ хойш тавьж хадгалдаг заншилтай.

Хүний нутагт байгаа нэгэндээ сар шинийн хэвийн боов аваачиж өгөөд, тамирчид маань монгол хүний ёсоор зүг мөрөө гаргаж байгааг элэглэж, дооглож, гэдсээ даран хөхрөлдөцгөөж байгаа улсыг юу гэж ойлгох вэ.

Тэр хувцас, загвар, өнгө төрх тамирчдад хүртээлгүй. Тэд бэлтгэл сургуулилт, шандас хүчээ тааруулж байснаас бус харандаа, хайч бариад загвар гаргадаг хүмүүс биш. Монгол хүний саруул ухаанаар үүнийг тунгааж, хол явсан тамирчдынхаа захыг мушгиж суух нь ард түмний үүрэг биш үү.