ШУУРХАЙ: Техаст 20 хүн буудуулан, амь насаа алдлаа

АНУ-ын Техас мужийн Эль-Пасо хотод өчигдөр /2019.08.03/ буун дуу гарч, 20 хүн амиа алджээ. Тус мужийн захирагч Грег Эбботт “CBS” телевизэд ярихдаа “Эль-Пасо хотын 20 гэмгүй иргэн амь насаа алдлаа. Халдлагын улмаас 40 гаруй хүн шархадсан” гэв. Халдлага Эль-Пасо хотын худалдааны төвд болжээ.

АНУ-ын Ерөнхийлөгч Доналд Трамп Техаст болсон хэргийг “хулчгар байдлын илрэл” гэжээ. Тэрбээр “Энэ явдал эмгэнэл төдийгүй хулчгар байдлыг харуулж байна. Би АНУ-ын бүх иргэний нэгэн адил энэ үзэн ядмаар явдлыг зэмлэн буруутгаж байна. Гэмгүй иргэдийг хөнөөсөн хэргийг зөвтгөх ямар ч зүйл байхгүй” гэсэн байна.

Трамп болон АНУ-ын Тэргүүн хатагтай Меланья Техасын ард иргэдэд чин зүрхний эмгэнэл илэрхийлж, тэдний төлөө залбирах болно гэдгийг АНУ-ын Ерөнхийлөгч мөн хэлжээ.

Эль-Пасогийн цагдаагийн газар нэгэн сэжигтнийг баривчилсан бөгөөд юунаас болж хүмүүс рүү гал нээснийг нь тогтоогоогүй байгаа аж. Баривчлагдсан залуу 21 настай, Даллас хотын иргэн гэнэ. Тэрбээр халдлага үйлдэхээсээ өмнө "Твиттер"-дээ Шинэ Зеландад 50 хүнийг хөнөөсөн халдлагыг дэмжиж байгаа тухайгаа бичсэн байжээ.