З.Энхболд: Би намдаа сонгуулийн хандиваа өгсөн

Монгол Улсын Ерөнхийлөгчийн Тамгын газрын дарга З.Энхболд өнөөдөр /2020.01.20/ хэвлэлийнхэнд өгсөн мэдээллийн үеэр сонгуульд оролцох хандивын мөнгөө намдаа тушаасан гэдгээ илэрхийллээ.

Тэрбээр “Сонгуульд нэр дэвшиж таарна. Ардчилсан нам нэр дэвших бодолтой хүмүүсээсээ хувь иргэнээс нэг сая хүртэл, байгууллагаас 10 сая төгрөг хүртэлх хэмжээний хандив цуглуулж өгөхийг хүсэж байгаа. Ардчилсан намын энэхүү хандивыг би хувиасаа өгөх биш намайг нэр дэвшүүлэхийг хүсэж буй иргэн, аж ахуйн нэгжүүд өгдөг. Би уриалж хандиваа өгсөн. Хоёрдугаар сарын 1-нд дараагийн 30 сая төгрөгийг өгнө.  Дэлхийн аль ч улсад хандивгүйгээр сонгууль болдоггүй. Америкийн Ардчилсан нам тодорхой хугацаанд цуглуулах мөнгөний босго тавьж, тэр нь сонгуулийн дараагийн шатандаа орох шалгуур болдог. Тэр хүнд хандиваар өгч дэмжсэн хүн байхгүй бол жинхэнэ сонгуульд өрсөлдөхдөө амжилт гаргаж чадахгүй гэж үздэг. Нэр дэвшигчийн үнэмлэхээ аваад, дансаа нээж хандив цуглуулах нь хуульд нийцсэн дэлхий нийтийн жишиг юм. 

Ардын намын Ерөнхий сайдын хэлсэнчлэн ямар ч хандивгүйгээр сонгуульд орно гэдгийг харин хуулийн байгууллага шалгах ёстой. Зардалгүйгээр сонгууль хийнэ гэж байхгүй. Ямар зардлаар сонгууль хийж байгаагаа ил тод тайлагнах ёстой” гэлээ.

АН сонгуульд нэр дэвших хүсэлтээ улс төрчдөөсөө 100 сая төгрөгийн хандив авч байгаа ба дээрх мөнгийг хуваарийн дагуу гурав хуваан намдаа тушаах ёстой аж. Энэ дагуу ЕТГ-ын дарга З.Энхболд намдаа эхний 40 сая төгрөгөө тушаасан байна. АН-аас нэр дэвших хүсэлтэй улс төрчид ирэх сарын 1-ний дотор 30 сая төгрөг, үлдсэн 30 сая төгрөгөө дөрөвдүгээр сард багтаан төлөх ёстой ажээ.