Украины тал Оростой ХАТУУ ЯРИА ХЭЛЭЛЦЭЭ хийсэн гэв

Орос, Украины яриа хэлэлцээний дөрөвдүгээр шат даваа гарагт цахимаар явагдлаа. Украины төлөөлөгчид Польшоор дамжин Беларус руу ирэхээс татгалзсан учир хэлэлцээг цахимаар хийхээр шийджээ.

Орос, Украины гал зогсоох ерөнхий зорилготой яриа хэлэлцээний дөрөв дэх шатны үеэр талууд өдөр бүр хэлэлцээ хийж байгаагаа мэдэгдэж, хэлэлцээнд техникийн түр завсарлага авна гэсэн байна. Украины Ерөнхийлөгчийн захиргаанаас “Хэлэлцээг мягмар гараг буюу гуравдугаар сарын 15-ныг хүртэл түр зогсоолоо. Цаашид ажлын хэсгүүд нэмэлт зүйлийг боловсруулж, зарим асуудлыг тодорхой болгохын тулд ийнхүү түр завсарлага авсан. Талуудын яриа хэлэлцээ үргэлжилж байна...” гэж мэдэгджээ.

Украины зүгээс “Даваа гарагт гал зогсоох, цэргээ нэн даруй гаргах, аюулгүй байдлын баталгааны талаар Оростой хатуу яриа хэлэлцээ хийсэн” гэж мэдэгдлээ. Мөн даваа гарагт Киев хотод орон сууцны барилга дайралтад өртөж, хүний ​​амь нас хохирсон ч гэсэн талууд яриа хэлэлцээгээ үргэлжлүүлнэ гэжээ. Энэ удаад талууд яриа хэлэлцээний явцад зарим үр дүнд хүрлээ гэж Украины төлөөлөгчид дүгнэсэн байна.

Яриа хэлэлцээний өмнөх шатуудад талууд Оросын цэргүүдэд бүслэгдсэн хотуудаас энгийн иргэдийг нүүлгэн шилжүүлэх, гал зогсоох асуудал дээр голчлон төвлөрсөн. Украины төлөөлөгч Михаил Подоляк дөрөв дэх шатны яриа хэлэлцээний өмнө “Орос яриа хэлэлцээг бүтээлч байдлаар эхэлсэн” гэж бичиж байв. Энх тайван, гал зогсоох, нэн даруй цэргээ гаргах, аюулгүй байдлыг хангах тухай нөхцөл тавьсан хэлэлцээний дөрөвдүгээр шатыг тэрбээр мөн “Энэ хэлэлцээг хийхэд хэцүү байсан. Яагаад гэвэл Орос, Украины улс төрийн тогтолцоо дэндүү ялгаатай” гэжээ. Украины Ерөнхийлөгчийн зөвлөх Михаил Подолякийн үзэж буйгаар Оросын тал энгийн иргэд бүхий хотуудад 19 хоног хүчирхийлэл үйлдэх нь зөв стратеги гэж эндүүрч байгаа аж.

Энэ хооронд даваа гарагт Украины талаас нээсэн гал олон давхар орон сууцны барилгад гал гарахад нөлөөлж, нэг хүн амиа алдсан талаар Оросын талаас мэдээлжээ. Уг орон сууцны оршин суугчдын нэгийнх нь ярьснаар хүмүүс шатаар буух боломжгүй болж, шат бүхэлдээ галд автсан байсан аж.

Оросын Батлан хамгаалах яам “Украины талаас хийсэн цохилтоор Донецкт хамгийн багадаа 20 хүн амиа алдаж, 28 хүн шархадсан” гэж мэдэгджээ. Оросын тал үүнийг цэргийн гэмт хэрэг гэж нэрлэнэ гэсэн ч Украины зүгээс Орос үүнийгээ батлаагүй гэсэн байна.

НҮБ-ын Хүний эрхийн байгууллагаас мэдэгдсэнээр Украинд байгаа НҮБ-ын ажиглагчид 636 энгийн иргэн, 46 хүүхэд амиа алдсан гэсэн тоо баримтыг гаргажээ. Гэхдээ хохирол үүнээс илүү байж магадгүй аж. Харьков, Мариуполь зэрэг дайралт эрчимтэй болж буй бүсүүд дэх амиа алдагсдын тоог тодорхой гаргахад бэрх байгаа юм.

Өнөөдрийн байдлаар Мариуполь хотод 2500 гаруй энгийн иргэн амиа алдсан гэж Украины Ерөнхийлөгчийн туслах Алексей Арестович мэдэгджээ. Мариуполь хотоос иргэдийг нүүлгэн шилжүүлэх нэг бус удаагийн оролдлого амжилтгүй болсон билээ. Гэхдээ хотын удирдлагууд даваа гарагт тус хотоос 160 автомашин гарсан гэж мэдэгдсэн байна.