Зуны улиралд арьсаа хэрхэн АРЧЛАХ вэ?

Зуны улиралд арьс арчилгаандаа заавал оруулах ёстой зүйл бол нарны тос. Нар шарсан энэ улиралд хэрхэн эрүүл арьстай байх, нарны тосыг хэрхэн зөв түрхэх талаар зөвлөгөө хүргэе.

Арьсаа бүү хуурайшуул

Зуны улиралд арьснаар тос ялгарах нь ихэсдэг. Гэхдээ нүүрэндээ байнга чийгшил өг. Арьс арчилгааны тань бүтээгдэхүүн арьсны балансыг тэнцвэржүүлэх ёстой. Тэжээлийн тос түрхэхээ зогсоох үе гэж огт байхгүй.

Нарны хамгаалалттай тос...

Бүрхэг өдөр ч нарны хамгаалалттай тос түрхэх ёстой. Та ямар ч арьстай байлаа гэсэн нарны хамгаалалттай тос түрхэхээ бүү мартаарай.

Нарны тосыг хэрхэн зөв түрхэх вэ:    

• Нарны тос нь арьсан дээр тодорхой хэмжээний бүрхүүл үүсгэж, уг бүрхүүл нь янз бүрийн төрлийн цацрагийг нүүрний арьсанд нэвтрүүлэхгүй байх үүрэгтэй. Тослог арьстай хүн тослог чанар бага агуулсан усан суурьтай нарны тос түрхээрэй. Харин хуурай арьстай бол чийгшил, тослогийг сайн агуулсан тос түрхэхийг арьсны мэргэжилтнүүд зөвлөжээ.

• Нарны тосны SPF болон PA гэсэн үзүүлэлтүүд нь нар, нарны цацрагаас хамгаалах үйлдэлтэй. Уг хоёр үзүүлэлт тодорхой хэмжээнд өндөр байж нарнаас хамгаалах ёстой ч хэт өндөр байж болохгүй. Хамгийн тохиромжтой SPF-ийн хэмжээ нь 15 болон 30 гэнэ. Харин 30 буюу түүнээс дээш бол байнга түрхэж болохгүй тос юм.

• Нарнаас хамгаалах тосыг гэрээсээ гарахаас 20-30 минутын өмнө түрхэж, арьсандаа шингээх хэрэгтэй байдаг. SPF 20-30-тай тосыг 2-3 цаг тутамд заавал сэргээж түрхэнэ.

• Нарны тосыг жилийн бүх улиралд түрхэнэ. Өвөл наргүй гээд түрхэхгүй байж болохгүй. Хавар, зуны улиралд нүүрний арьсаа илүү их хамгаалж байх хэрэгтэй.

Тоникоос бүү татгалз

Тоник байнга хэрэглэх нь чухал. Энэ нь нүүрний будагнаас үлдсэн бохирдлыг сайтар цэвэрлэнэ. Мөн арьсыг чийгшүүлдэг.

Гуужуулахдаа болгоомжтой бай

Арьсаа гуужуулах нь нүх сүвийг нь цэвэрлэх арга юм. Гэхдээ тослог арьстай бол гуужуулагч танд тохирохгүй. Бактер арьсны нүх сүвэнд тархах эрсдэлтэй юм.