ТӨВ: Төрөх эмнэлгийн барилгыг ирэх онд ашиглалтад оруулна

О.Шинэтуяа | Zindaa.mn
2022 оны 05 сарын 25

Өнөөдөр аймгийн Нэгдсэн эмнэлгийн өргөтгөл болох 50 ортой төрөх эмнэлгийн барилгын шав тавилаа. Шав тавих ёслолын ажиллагаанд УИХ-ын гишүүн Ж.Батжаргал, аймгийн Засаг дарга Д.Мөнхбаатар, Засаг даргын орлогч Ц.Буманбуян, аймгийн удирдлагууд, Нэгдсэн эмнэлгийн удирдлага, ажилтан, албан хаагчид, барилгын гүйцэтгэгч “Клаймакс интернэйшнл” ХХК-ний удирдлага, хамт олон оролцсон юм.

Төв аймгийн хэмжээнд жилд 2000 гаруй эх амарждаг бөгөөд үүний 1000 орчим нь аймгийн Нэгдсэн эмнэлгийн төрөх тасагт амаржиж байна. Мөн жилдээ 200 гаруй эх хийсвэр мэс заслын заалттай төрж байгаа юмл. Төрөх эмнэлэг нь эхийг төрүүлэхээс гадна эмэгтэйчүүдийн өвчлөлийг давхар эмчилдэг тул өнөөдрийн энэхүү 50 ортой төрөх эмнэлэг нь маш олон жилийн хүлээлттэй, цагаа олсон ажил боллоо гэдгийг эрүүл мэндийн салбарынхан онцолж байна.

Төв аймгийн нутгийн удирдлагын байгууллагаас нийгмийн салбарын барилга байгууламж, тоног төхөөрөмж, боловсон хүчний хангалтыг нэмэгдүүлэхэд анхааран ажиллаж, өнгөрсөн онд эрүүл мэндийн салбарт 9.1 тэрбум, үүнээс орон нутгийн 1.9 тэрбум төгрөгийн хөрөнгө оруулалт хийж, Өндөрширээт, Баян-Өнжүүл, Заамар сумын Хайлааст багийн ЭМТ-ийн шинэ барилга, Эрдэнэсант, Алтанбулаг сумын ЭМТ-ийн өргөтгөл, их засвар зэрэг 6 суманд Эрүүл мэндийн төв, аймгийн Нэгдсэн эмнэлэгт “Эрүүл мэндийг дэмжих төв”-ийг шинээр байгуулаад байна. Үүнийг дагаад тоног төхөөрөмжийн хангалтыг сайжруулах ажлыг үе шаттай хэрэгжүүлэн 2021 онд аймгийн Нэгдсэн эмнэлгийн тоног төхөөрөмжийн стандарт хангалтыг 72,5 хувьд хүргэж, суурь түвшнээс 10 гаруй хувиар нэмэгдүүллээ. Мөн тус салбраын хүний нөөцийн хангалтыг нэмэгдүүлэх, чадавхижуулах, нийгмийн асуудлыг шийдвэрлэж 2018-2021 онд 77 эмч, эмнэлгийн мэргэжилтнүүдийг орон байраар хангаж, “Сувилагч” хөтөлбөрийн хүрээнд 19 оюутан залуусын сургалтын төлбөрийн тодорхой хувийг шийдвэрлэн, сум, орон нутагтаа ажиллуулж байна.

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top