Монголын балетын Үндэсний сургуулийн сурагчид ОХУ, Канадад суралцана

Монголын балетын Үндэсний сургуулийн сурагчид ОХУ болон Канадын Үндэсний балетын сургуульд суралцахаар болжээ. 

Тус сургуулийн "Дунд шат 3" ангийн сурагч Х.Тэгшжаргал ОХУ-ын Вагановагийн нэрэмжит балетын академид суралцах ОХУ-ын Засгийн газрын 100% тэтгэлэг хүртсэн байна.

Мөн Гүнзгий шатны сурагч Г.София Канадын Үндэсний балетын сургуулийн үндсэн хөтөлбөрт суралцахаар болсон бол "Дунд шат 2" ангийн сурагч Б.Мөрөн мөн Канадын Үндэсний балетын сургуулийн зуны хөтөлбөрийн шалгаруулалтад тэнцжээ. 

Балетын сургуулийн хаалгаар 5, 8, 9 настай байхдаа ээж, аавынхаа гараас хөтлөн, балет гэдэг зүйлийг сониучирхан орж ирсэн бяцхан сурагчдын авьяас билиг, хүсэл эрмэлзэл нь хил, тив даван гялалзаж буйд туйлын баярлаж, бахархаж буйгаа Монголын балетын Үндэсний сургуулийн хамт олон илэрхийлэн, амжилт хүсжээ.