Шинэ 11 сургууль ашиглалтад орсноор 6920 суудал нэмэгдэнэ

Улсын төсвийн хөрөнгөөр баригдаж буй 11 сургуулийн барилга, 1 дотуур байр тендерийн хугацаагаараа 2025 онд ашиглалтад орох товтой. Боловсрол, шинжлэх ухааны яамны зүгээс төслийн гүйцэтгэгч компаниудад барилгаа 2024.09.01-ээс өмнө болон энэ хичээлийн жилийн нэгдүгээр улиралд багтаан бүрэн ашиглалтад оруулах тухай албан бичгийг хүргүүлэв.

Тус барилгууд ашиглалтад орсноор сургуулиудын хүчин чадал 6920 суудлаар нэмэгдэж, энэ тооны сурагчид гурван ээлжээр хичээллэх эрсдэлгүй болох юм.

Боловсролын сайд П.Наранбаяр дээрх асуудлаар өчигдөр гүйцэтгэгч аж ахуйн нэгжүүдийн төлөөлөлтэй уулзав. Төлөвлөсөн хугацаанаасаа өмнө барилгаа ашиглалтад оруулахаар идэвх санаачилгатай ажиллаж буйд нь тэрбээр талархал илэрхийлсэн юм. 

Заасан хугацаанд барилгаа бүрэн ашиглалтад оруулсан тохиолдолд ирэх оны санхүүжилтийг энэ онд багтаан бүрэн олгох зохицуулалт хийхээр ажиллаж буйгаа хэлж, цаашид хувийн хэвшил ажлаа чанартай, шуурхай гүйцэтгэхэд шаардлагатай нөхцөлд төр баталгаа өгч, хариуцлагатайгаар түншлэх ёстойг онцоллоо.