ХЭН ЮУ ХЭЛЭВ | Одоо ах нар бүгдээрээ амарцгаа!

Энэ удаагийн “ХЭН ЮУ ХЭЛЭВ” буланд УИХ-ын гишүүн С.Цэнгүүн, УИХ-ын гишүүн Ө.Шижир, УИХ-ын гишүүн асан С.Эрдэнэ нарын хэлсэн үгнээс онцолж байна.

УИХ-ын гишүүн С.ЦЭНГҮҮН: Эрчим хүчний салбарт ажиллаж байгаа олон хүнтэй  уулзсаар байна. Үнэ тариф алдагдалгүй болох ёстой гэдгийг бүх удирдлага дуу нэгтэй дэмжиж байгаа ч үндсэн эрчим хүчний зах зээлийн загварыг шинэчлэх, чөлөөт өрсөлдөөний зарчимд шилжүүлэхийг төдийлөн ойшоохгүй байгаа нь анзаарагдсан. Энэ салбарыг ашигтай, бие даан ажиллах механизмтай болгох нь зорилго болохоос биш үнийг тогтоож хэсэг хугацаанд гал унтраах биш юм. Миний харж байгаагаар энэ реформын хамгийн том сорилт нь иргэд биш, төрийн өмчит компаниудын хөшүүн бүтэц, тогтсон соёл байх.

УИХ-ын гишүүн Ө.ШИЖИР: Өнгөрсөн 2017 оноос хойш АН маань сүүлийн бүх шатны долоон сонгуульд бүгдэд нь амжилт үзүүлээгүй. Одоо ах нар бүгдээрээ болно, амарцгаа. 2020 оны дөрвөн сараас хойш манай намд нэг ч албан ёсны генсек байсангүй, бүгд л үүрэг гүйцэтгэгч. Дандаа түр орлонтой байгаад тав дахь жилдээ орж байна.

УИХ-ын гишүүн асан С.ЭРДЭНЭ: Ө.Шижир ээ, дарангуйллын эсрэг амь насаараа дэнчин тавьж тэмцэж, Ардчиллын суурийг тавьж галыг асаалцсан хүмүүсийг амарцгаа гэж байгаа бол нэгдүгээрт, чамд тийм эрх байхгүй. Хоёрдугаарт, чам шиг тэмцлийн утаа үнэрлэж үзээгүй, цүнх барьж лифтээр өгсөж эрх мэдэлд хүрсэн нусан буу ингэж томордоггүй юм.