ХӨСҮТ | Улирлын ханиад, томуугаас урьдчилан сэргийлэх энгийн аргууд

Халдварт өвчин судлалын үндэсний төвөөс томуу, томуу төст өвчний нөхцөл байдлын талаар мэдээлэл өглөө.

Мэдээллийн үеэр "Томуу, томуу төст өвчнийг насны ангиллаар нь авч үзвэл нийт өвчлөгсдийн 80 орчим хувийг 15 хүртэлх насныхан эзэлж байна. Үүний 50-60 орчим хувийг дөрөв хүртэлх насны хүүхдүүд эзэлж байна. Уушгины хатгалгаа өвчний улмаас эмнэлэгт хэвтэн эмчлүүлж буй хүүхдүүдийн 90 орчим хувийг 15 хүртэлх насныхан, үүний 60-70 орчим хувийг дөрөв хүртэлх насны хүүхдүүд эзэлж байна. Дөрөв хүртэлх насны хүүхдүүдийн 40-50 хувийг хоёр хүртэлх насны хүүхдүүд эзэлж байгаа бөгөөд уг өвчин нь хоёр хүртэлх насны хүүхдүүдэд элбэг тохиолдож буйг харуулж байна. 

Бага насны хүүхдүүдийн дунд өвчлөл ихсэж байгаатай холбогдуулан эцэг, эхчүүдэд зөвлөхөд хүүхдэд халуурах, хоолой өвдөх, толгой өвдөх, бөөлжих, суулгах зэрэг шинж тэмдэг илрэх юм бол харьяа Өрхийн эрүүл мэндийн төвдөө хандаж, мэргэжлийн эмчийн заавар зөвөлгөөгөөр эмчилгээ хийлгэх шаардлагатай. Үүнээс гадна энгийн урьдчилан сэргийлэх аргуудыг өдөр тутамдаа хэрэгжүүлэх шаардлагатай. 

Үүнд агаар сэлгэлтийг өдөрт 2-3 удаа хийх, чийгтэй цэвэрлэгээ 7 хоногт 2-3 удаа хийх, шаардлагагүй тохиолдолд олон нийтийн газраар бага насны хүүхдээ авч явахгүй байхыг зөвлөж байна. Хэрэв эмнэл зүйн шинж тэмдгүүд илрэх юм бол амны хаалтыг зөв, зохистой хэрэглэж, ханиалгаж, найтаахдаа зөв ханиалгаж, найтаахыг зөвлөе" гэлээ.

ДЭЛГЭРЭНГҮЙ ҮЗЭХ