ХЯНАЛТ: Жимс, ногооноос 44 нэр төрлийн ПЕСТИЦИДИЙН ҮЛДЭГДЭЛ илэрчээ

Нийслэлийн иргэдийн хүнсний хэрэгцээнд нийлүүлж буй мах махан бүтээгдэхүүн, жимс, хүнсний ногооны чанар, аюулгүй байдалд хяналт шалгалт хийж, дүгнэлт гаргах чиг үүрэг бүхий хамтарсан Ажлын хэсгийнхэн 2024.12.12 - 2024.12.25-ны өдрийн хооронд нийслэлийн "Амгалан" зах, "Баялаг ундраа", "Баянзүрх", "Хүчит шонхор", "Наран туул-2" зах, "Хархорин" худалдааны төв болон 21 аймгийн зах, худалдааны төвүүдэд хяналт шалгалт хийжээ.

Ххяналт шалгалтын явцад нийслэлийн зах, худалдааны төвүүдэд борлуулагдаж байсан жимс, хүнсний ногооноос 44 нэр төрлийн пестицидийн үлдэгдэл илэрсэн байна. 

ЯВУУЛЫН ЛАБОРАТОРИАР ЖИМС, ХҮНСНИЙ НОГООНООС ДЭЭЖ АВЧ ШИНЖЛЭХЭД ОЛОН ТӨРЛИЙН ПЕСТИЦИДИЙН ҮЛДЭГДЭЛ ИЛЭРЧЭЭ

Лабораторийн шинжилгээгээр жимс, хүнсний ногоонд агуулагдаж буй Пестицидийн үлдэгдлийг хянахад нийслэлийн зах, худалдааны төвүүдэд борлуулагдаж байгаа жимс, хүнсний ногооноос 44 нэр төрлийн Пестицидийн үлдэгдэл илэрчээ. Үүний 39 нэр төрөл нь Монгол Улсын стандартад бүртгэгдээгүй Пестицид байсныг ХАБҮЛЛ-ийн захирал О.Нандин-Эрдэнэ онцолж байна. Олон улсад мянга гаруй нэр төрлийн Пестицид байдгаас манай улс 221 нэр төрлийн Пестицидийн үлдэгдлийг хянах боломжтой байна.

Түүнчлэн Стандарт, хэмжил зүйн газар худалдаа эрхлэгчдийн жин хэмжүүрт хяналт шалгалт хийхэд,
 

• Загварын туршилтад хамрагдаагүй хэмжих хэрэгсэл ашигласан - 21
• Хэмжих хэрэгслийн баталгаажуулалтын гэрчилгээний хүчинтэй хугацаа дууссан - 46
• Хэмжих хэрэгслийн баталгааны лацны бүрэн бүтэн байдал алдагдсан - 9 зөрчил илэрсэн байна. 
  
   

"Амгалан", "Баялаг-Ундраа", "Баянзүрх", "Хүчит шонхор", "Нарантуул-2" зах, "Хархорин" худалдааны төвийн хүнсний лабораторид шалгалт хийхэд Зургаан лабораторийн тав нь итгэмжлэгдээгүй байсан зөрчил тус тус илэрчээ. Тухайлбал, 
 

• Махны дээжээс авсан шинжилгээний хариу гараагүй байхад худалдан борлуулж байсан,
• Нийслэлийн мал эмнэлгийн газар улиралд нэг удаа хяналтын дээж шинжилдэг, хяналтын хугацаа хэт хол,
•  Лаборатори нь Итгэмжлэгдээгүй байхад иргэдээс мөнгө авч шинжилгээ явуулдаг гэх мэт зөрчил илэрсэн байна.

Мал эмнэлгийн байгууллагаас нийслэлийн долоон худалдааны төвд борлуулагдаж байгаа мах, махан бүтээгдэхүүнээс 58 сорьц авч, гурван төрлийн шинжилгээ хийжээ. Шинжилгээгээр ноцтой зөрчил илрээгүй ч дараах зөрчлийг танилцуулсан юм.
 

• Махны хадгалалт, худалдаалалтын үеийн температурын хяналт тавьж, бүртгэл хөтлөөгүй,
• Ажиллагсад зориулалтын ажлын хувцас, малгай, бээлий өмсөөгүй,
• Худалдаанд хэрэглэх сав, суулга, хутга, багаж хэрэгслийг цэвэрлэж халдваргүйжүүлэх тусдаа цэггүй,
• Махыг эвдэж, жижиглэж, шулах байрны хана зарим хэсгээрээ хуурч унасан, цэвэрлэж, халдваргүйжүүлэхэд тохиромжгүй,
• Худалдааны төвийн дэргэдэх мал эмнэлгийн лабораторид орох хэсэг Оффисын ажилчдын өрөөтэй давхацсан, урсгал буруу гэх мэт зөрчил бүртгэгджээ. 

Тиймээс эдгээр шалгалтын явцтай холбогдуулан Шадар сайд С.Амарсайхан холбогдох албаныханд дараах үүрэг, чиглэлийг өгсөн байна. 
 

• Хүнсний аюулгүй байдал, чанар стандартад анхаарч цаашид хяналт шалгалтыг тогтмолжуулах
• Итгэмжлэгдээгүй хүнсний лабораториудад шаардлага тавьж, Итгэмжлэх
• Шаардлагатай стандартыг шинэчлэн батлах
• Пестицидийг илрүүлэх нэр төрлийг нэмэгдүүлж, Олон улсын стандартад нийцүүлэн ажиллах
• Хүнсний зах, худалдааны төвүүдэд шаардлага тавьж, хариуцлага тооцох гэх мэт арга хэмжээ авч, цаашид төлөвлөгөө гаргаж ажиллахыг тус тус үүрэг болгожээ.