Л.Оюун: Ам.долларын ханш цагаан сарын өмнө савлаж байгаагаас цаашид өсөхгүй

Ам.долларын ханш сүүлийн саруудад тогтвортой байсан.Харин өнгөрсөн долоо хоногийн хугацаанд ам.долларын ханш 3475-3510 төгрөг болж өссөн мэдээллийн олон нийт тийм ч таатай хүлээж авсангүй. Тухайлбал, Найман шаргад ам.доллар хоёрдугаар сарын 3-нд худалдан авах нь 3468, худалдах нь 3475 байсан. 

Найман шарга валют арилжааны төвд худалдан авах 3495, худалдах 3510 төгрөг болсон байна. Тиймээс зах зээл дээрх албан ба хар захын ханшийн зөрүү 30-40 төгрөгт хүрэв. Харин юанийн  ханш өнгөрсөн долоо хоногт 471-474 төгрөг байсан бол өчигдөр 476-479 төгрөгт хүрчээ. Монголбанкны өчигдрийн ханшийн мэдээллээр ам.долларын ханш 3455 төгрөг, юанийн ханш 474 төгрөгтэй байна.

Эдийн засагчдын хэлж байгаагаар валютын ханш ирэх саруудад хэлбэлзэж, ханш савалж магадгүйг бичжээ. Харин бид энэ тухайд Эдийн засгийн шинжлэх ухааны доктор профессор Л.Оюунаас тодруулсан.

-Ам.долларын ханш өслөө гэж байна. Ямар шалтгаанаас болж өсөв?

-Манай улсын эдийн засгийн мөчлөг гэж бий. Түүгээрээ л явж байна. Өөрөөр хэлбэл улирлын чанартай эдийн засагтай юм. Тиймээс ам.долларын ханш Цагаан сарын өмнө, Улсын баяр наадмын өмнө байнга өсөж хэлбэлздэг. Энэ бол байдаг л үзэгдэл.

-Одоо 40 төгрөгөөр өсөж байгаа болохоор цаашид зогсолтгүй явчих юм биш биз гэх хүмүүс бий. Цаашид ам.долларын ханш тэр чигтээ чангараад явчихвал яана?

-Тийм зүйл байхгүй. Ам.долларын ханш эдийн засгийн мөчлөг, уламжлал ёсоор Цагаан сарын өмнө бага зэрэг савлаж байгаагаас цаашид өсөхгүй. Төрөөс ч төгрөгийг хүчтэй чанга байлгаж, гаднын хөрөнгө оруулалт татах зорилготой ажиллаж байгаагаа хэлж байсан.

-Та нэлээд баттай хэлж байна, суурь шалтгаанууд юу байна?

-Сүүлийн үед үнэт цаасны зах зээл нэлээд сэргэж эхэлсэн. Цаашдаа үнэт цаасны зах зээл дээр бонд хувьцаа авах, хөрөнгө оруулалт хийх боломжуудыг илүү сайн өргөжүүлэх шаардлагатай. Ингэснээр иргэдийн хувьд төгрөгөөр өндөр өгөөжтэй хөрөнгө оруулалт хийж болно гэдэг ойлголт ч нэмэгдэнэ. Энэ нь зохиомол эрэлтийг багасгах сайн талтай байдаг.

МОНГОЛБАНК: ӨДИЙ ҮЕД ВАЛЮТЫН ОРЛОГО БУУРЧ, ЭРЭЛТ НЭМЭГДЭХ, ТӨГРӨГИЙН ХАНШ СУЛРАХ ҮЗЭГДЭЛ БИЙ БОЛДОГ

Ам.долларын ханш сүүлийн саруудад тогтвортой байсан. Харин өнгөрсөн долоо хоногийн хугацаанд ам.долларын ханш 3475-3510 төгрөг болж өсчээ. Тиймээс зах зээл дээрх албан ба хар захын ханшийн зөрүү 30-40 төгрөгт хүрэв. Харин юанийн  ханш өнгөрсөн долоо хоногт 471-474 төгрөг байсан бол өнөөдөр 476-479 төгрөгт хүрсэн байна. Тэгвэл энэ талаар Монголбанкнаас тодруулахад “Монголбанкнаас зарласан төгрөгийн ам.доллартой харьцах ханш 2025 оны нэгдүгээр сарын 21-ний өдрийн байдлаар 3433.03 төгрөгт хүрч, оны эхнээс 12.57 төгрөг буюу 0.37 хувиар, өмнөх оны мөн үеэс 26.52 төгрөг буюу 0.78 хувиар тус тус суларсан. Монгол Улсын эдийн засагт улирлын шинжтэй хэлбэлзэл ажиглагддаг бөгөөд валютын зах зээлийн хувьд жил бүрийн 1, 2 дугаар сард Цагаан сарын баяр, гадаад орныг чиглэх аялал жуулчлал нэмэгдэх, нөгөө талаар хүйтний улиралд уул уурхайн салбарын үйл ажиллагаа удаашрах зэрэгтэй холбоотойгоор гадаад валютын орлого буурч, эрэлт нэмэгдэх, улмаар төгрөгийн гадаад валюттай харьцах ханш сулрах үзэгдэл бий болдог” гэлээ.