Мартахгүйн тулд санан дурсах учиртай өдөр

6 дугаар сарын 22-ны өдөр буюу Санан дурсах, гашуудлын өдөр “Русский Дом”-д Аугаа Эх орны дайн эхэлсний ойд зориулсан дурсгалын арга хэмжээг зохион байгуулагдлаа.

Зочдод зориулан “Түүхэн баримт бичиг дэх Германы нацизм” сэдэвт гэрэл зургийн үзэсгэлэнг толилуулав. ОХУ-аас Монгол Улсад суугаа Элчин сайдын яамны атташе Борис Кушхов үзэсгэлэн болон Дэлхийн хоёрдугаар дайны жилүүдэд нацист дэглэмийн үйлдсэн гэмт хэргийг гэрчлэх архивын баримт материалын талаар танилцууллаа.

Хөтөлбөрийн хүрээнд дайны үеийн эмгэнэлт хуудсуудыг өгүүлсэн “Травники” киног толилуулж, амь үрэгдэгсдийн гэгээн дурсгалыг хүндэтгэн арга хэмжээнд оролцогчид 1941-1945 онд Монголоос фронтод мордсон дайчдын дурсгалд зориулан босгосон “Тогоруун цуваа” хөшөөнд цэцэг өргөв.

Дурсгалын үдэш “Русский Дом” дахь хүндэтгэлийн арга хэмжээгээр өндөрлөж, Аугаа Эх орны дайны ахмад дайчдын нэрс бүхий дурсгалын самбарын дэргэд зочид лаа асааж, амь үрэгдэгсэд болон Ялалтыг ойртуулахад хувь нэмрээ оруулсан бүх хүний гэгээн дурсгалыг хүндэтгэв.

Тус арга хэмжээнд Оросын Холбооны Улсын Монгол Улс дахь цэргийн болон цэрэг-агаарын атташе П.В. Петрунин, Оросын Холбооны Улсын “Россотрудничество” агентлагийн Монгол Улс дахь Төлөөлөгчийн газрын дэд тэргүүн А.И.Каламин, Оросын Холбооны Улсын Батлан хамгаалах яамны дэргэдэх Нийгмийн зөвлөлийн гишүүн, Москвагийн буддистуудын тэргүүн Баир-лам Цымпилов, Улаанбаатар дахь Свято-Троицкийн сүмийн хамба лам, эцэг Владислав Ратников, Монгол дахь Оросын эх орон нэгтнүүдийн байгууллагуудын Зохицуулах зөвлөлийн дарга М.Г. Таракановская, ОХУ-аас Монгол Улсад суугаа Элчин сайдын яам болон Улаанбаатар дахь “Русский Дом”-ын ажилтнууд, эх орон нэгтнүүд, Монголын олон нийтийн байгууллагуудын төлөөлөл болох “Үнэнч мөнх андууд” байгууллагын Н.Ганболд, Бат-Эрдэнэ, “Друзья Новороссии” байгууллагын Б.Батболд, Монголын хурандаа нарын холбооны төлөөлөгчид, нийгмийн зүтгэлтнүүд, мөн Орос, Монголын хэвлэл мэдээллийн байгууллагуудын төлөөлөгчид оролцов.

Санан дурсах, гашуудлын өдөр нь бидэнд 1941 оны 6 дугаар сарын 22-ны эмгэнэлт үйл явдлыг сануулж, Ялагчдын баатарлаг гавьяаг үеийн үед хадгалан дурсах нь хэчнээн чухал болохыг дахин мэдрүүлдэг билээ.