Шинэ төрсөн хүүхдүүд Хүний хөгжлийн сангийн дэвтрээ авч чадахгүй байна

Манай сонинд Чингэлтэй дүүргийн иргэдээс "Шинэ төрсөн хүүхдүүдэд Хүний хөгжлийн сангийн дэвтэр олгохгүй байна" гэсэн мэдээллийг ирүүлсэн юм.  Чингэлтэй дүүргийн зарим хорооны мэргэжилтнүүд хүүхдийнхээ "Хүний хөгжил сан"-гийн дэвтрийг авахаар очсон эцэг, эхчүүдэд "Дэвтэр дууссан. Ямартай ч материалыг нь бүрдүүлээд өгчих" гээд буцааж байгаа ажээ. Иймд энэ мэдээллийн дагуу Чингэлтэй дүүргийн гуравдугаар хороон дээр очиход мөн л энэхүү хариуг өгч байлаа. Тус хорооны мэргэжилтнүүдээс учрыг лавлахад "Дүүргийн Хөдөлмөр, халамжийн хэлтэсд дэвтэр байхгүй гэсэн. Хэзээ ирэхийг хэлж мэдэхгүй байна" гэсэн юм. Биднийг тэнд байх үеэр ч хэд, хэдэн хүн "Дэвтэр нь ирсэн үү" гэж асуусаар орж ирэв. Тэд мэдээж тодорхой хариулт авч чадаагүй. Тиймээс үүнд тодорхой хариулт авахаар Хөдөлмөр, халамжийн үйлчилгээний газрыг зорьсон юм.

Д.Чойжилсүрэн: Хороодын мэргэжилтнүүд л дэвтрээ татаж аваагүй байгаа байх
Хөдөлмөр, халамжийн үйлчилгээний газрын Халамжийн үйлчилгээний хэлтсийн дарга Д.Чойжилсүрэнгээс "Хүний хөгжил сан"-ийн дэвтэртэй холбоотой иргэдийн мэдээллийн дагуу тодруулга авав.

-Чингэлтэй дүүргийн хэд, хэдэн хороонд шинэ төрсөн хүүхдүүдэд "Хүний хөгжил сан"-гийн дэвтрийг олгохгүй "Дэвтэр цаанаасаа ирэхгүй байгаа" гэсэн хариултыг өгч байна?
-Дэвтэр дууссан гэсэн хариулт өгөх ёсгүй. Магадгүй тухайн хорооны мэргэжилтнүүд нь дүүргийн Хөдөлмөр, халамж үйлчилгээний хэлтсээсээ дэвтрээ татаж аваагүй байж ийм хариу хэлж байгаа байх.

-Дэвтэр хангалттай байгаа гэсэн үг үү?
-Тийм. Хангалттай байгаа. Шинэ төрсөн хүүхдүүдэд олгоод л явах ёстой.

-Дэвтрийг танай газраас авах ёстой юмуу, эсвэл тухайн дүүргийн Хөдөлмөр, халамж үйлчилгээний хэлтсийн хариуцсан ажил уу?
-Дүүргийн Хөдөлмөр, халамж үйлчилгээний хэлтсүүдэд хангалттай хэмжээгээр дэвтрийг хэвлээд өгчихсөн. Хороод дээр дэвтэр дууссан бол Хөдөлмөр, халамж үйлчилгээний хэлтсээсээ очоод л авчих ёстой.

Тэрбээр ийн ярив. Түүнтэй уулзсаны дараа Чингэлтэй дүүргийн Хөдөлмөр, халамж үйлчилгээний хэлтэс дээр очсон юм. Тус хэлтсийн иргэдэд үйлчлэх танхимд ч "Хүний хөгжил сан"-гийн мөнгө, дэвтэртэй холбоотой асуултад хариулт авах хүсэлтэй иргэд цөөнгүй байсан юм. Нэг хэсэг нийслэлийн олон мянган иргэний Эх орны хишиг дансанд нь орохгүйн улмаас харьяа дүүргийнх нь Хөдөлмөр, халамжийн үйлчилгээний хэлтэс болон Улсын бүртгэлийн ерөнхий газрын үүдэнд урт дараалал үүсгэж байсан.
Гэхдээ одоо ч тодорхойгүй шалтгааны улмаас "Хүний хөгжил сан"-гийн мөнгөө авч чадахгүй байгаа иргэд ийнхүү олон байгаа ажээ. Харин мөнгө, дэвтрээ авч чадахгүй байгаа иргэдийн нэгээхэн хэсэг нь эхээс мэндлээд удаагүй байгаа хүүхдүүд болоод байгаа нь энэ. Уг нь Д.Чойжилсүрэн даргын хэлснээр бол "Хүний хөгжил сан"-гийн дэвтрийг дүүргүүдийн Хөдөлмөр, халамжийн үйлчилгээний хэлтсүүдэд хангалттай хэмжээгээр хэвлээд өгчихсөн аж.
Харин Чингэлтэй дүүргийн Хөдөлмөр, халамж үйлчилгээний хэлтсийн мэргэжилтэн Э.Сайнбилэг "Зарим хороонд дэвтэр нь дуусчихсан байгаа. Цаанаасаа ирээгүй байсан юм. Гэхдээ удахгүй дэвтрийг хороодод тараана" хэмээв. Тодруулбал, энэ долоо хоногийн сүүлчээс эхлээд "Хүний хөгжил сан"-гийн дэвтрийг өгч эхлэх гэнэ.
Тус хэлтэс дээр хэсэг хугацаанд шинэ дэвтэр тасарсан байсан ч саяхнаас ирүүлсэн аж. Нэг ёсны хороо, дүүрэг болон Хөдөлмөр, халамжийн үйлчилгээний газрынхны ийнхүү "Дээрээс ирэхгүй байна. Өөрсдөө л дэвтрээ татаж аваагүй байгаа юм байлгүй" гэсэн үг үнэний ортой бололтой.

Эх сурвалж: Улс төрийн тойм сонин