Хүний амь хөнөөгөөд зугтсан этгээдийг олж тогтоожээ

Цагдаагийн байгууллагад энэ сарын 29-ний өдрийн 19:00 цагийн орчимд “Манай гэрт орж ирсэн хүн сэрэхгүй байна” гэх дуудлага, мэдээлэл бүртгэгджээ. Дуудлага, мэдээллийн дагуу шалгалтын ажиллагаа явуулахад иргэн “Х” нь бусдын амь насыг хохироогоод хэргийн газраас зугтсан болох нь тогтоогдсон байна.

Улмаар түүний хүүхдүүд хэргийн талаар мэдсэн атлаа нуун дарагдуулж, хаацайлсан нөхцөл байдал тогтоогджээ. Уг хэргийг Эрүүгийн хуулийн тусгай ангийн 10.1 дүгээр зүйлд заасан хүнийг алах гэмт хэргийн шинжтэй гэж үзэн, гэмт этгээдийг шуурхай олж тогтоох чиглэлээр мөрдөн шалгах ажиллагаа явуулсан байна. Үүний үр дүнд сэжигтэн этгээдийг энэ сарын 30-ны өдөр Чингэлтэй дүүргийн нутаг дэвсгэрээс олж тогтоон, саатуулжээ.

Тухайн этгээд амиа хорлох зорилгоор биедээ хутга болон гутлын үдээс авч явсныг цагдаагийн алба хаагчид таслан зогсоосон бөгөөд одоогоор шалгалтын ажиллагаа үргэлжилж байна.

Иймд иргэд гэмт хэрэг, зөрчлийн талаар мэдсэн тохиолдолд цагдаагийн байгууллагад нэн даруй мэдэгдэж, 102 тусгай дугаарт мэдээлэл өгөхийг цагдаагийн байгууллагаас анхаарууллаа.