Дуучин Нара англи хэлний багш болжээ

Монголын рок попын содон имижийг бүрдүүлэгч бүсгүйчүүдийн нэг нь дуучин Нара. Түүний шаргуу, дайчин чанар эрчүүдийг ч хөлдөө чирсээр байна. 90 жилийн ойн баяр наадмын өмнө “Монгол наадам” дуугаа олны хүртээл болгож, Болдын “Монгол поп” урсгалтай хөл нийлүүлж шуугиан тарьсан тэрээр дараагийн шинэ уран бүтээлээ ирэх есөн сард гаргахаар ажиллаж байгаа ажээ. Нарад хүмүүс зөвхөн дуучных нь хувьд дүгнэлт өгдөг. Тэгвэл бие хүний төлөвшил талаасаа дуулахын хажуугаар боловсролдоо чамгүй анхаардаг нэгэн гэдгийг сонсогчид тэр бүр мэддэггүй, өөрөө ч зарлаад яваад байдаггүй ажээ. Арван жилд байхдаа л англи хэл судлах болсон Нара төгсөх ангидаа Соросын сангийн тэтгэлгээр хэрэгждэг Нээлттэй мэтгэлцээний холбооны Англи хэл дээрх мэтгэлцээнд оролцож, шагнал хүртэж явсан удаатай. Тэр төгсөхдөө англи хэлийг хэнээс ч дутахгүй эзэмшсэн боловч гадагш явах болохдоо Япон улсыг сонгосон байна. Нара арлын оронд зургаан жил суралцахдаа Япон хэлийг ёстой л ус цас шиг сурчээ. Тэр өөрийнх нь анхны сонгож авсан англи хэлээ ч бас орхисонгүй, улам баяжуулаад ирсэн байна.

Урлагийнхан дундаа хэлний боловсролоороо дээгүүрт гишгэдэг дуучин бүсгүй маань өөрийн сурсан мэдсэнийг хүүхдүүдтэй хуваалцаж эхэлжээ. Тэр“Доктор Инглиш” англи хэлний сургуулийн урилгаар Хандгайтын аманд, байгалийн үзэсгэлэн цогцолсон Баянхангай эко кэмпэд очиж English Summer School вакум сургалтанд хамрагдаж байгаа суралцагч хүүхдүүдэд англи хэлний ярианы дадлагын хичээлд ордог ажээ. Түүний хичээл түүдэг галын дэргэд болдог гэсэн. Тэр гадаад дотоодын урлагийн оддын талаар, урлагийн хүн байхын тулд ямар төлөвшилтэй байх талаар, өөрийнхөө гадаад хэл сурсан туршлага зэргээсээ хуваалцаж түүдэг гал тойрон суусан охид, залуустай яг л найзууд шиг харилцаж, хичээлээ заадаг ажээ. Дашрамд дурьдахад English Summer School зуны вакум сургалтын хамгийн сүүлчийн ээлж буюу тавдугаар ээлж 8-р сарын 13-нд кэмп рүүгээ хөдлөх юм байна. Англи хэл сурахын зэрэгцээ Дуучин Нара, Соко, Нэгэнзүгт, Мотив зэрэг залуу ододтой найзалж, цагийг зугаатай өнгөрөөхийг хүсвэл 91236666, 88993035 утас руу ярьж болох юм байна.  Энэ мэдээ бол реклам биш шүү. Хэлгүй бол хөлгүй болсон энэ цаг үед таны сонголтонд нэмэр болгох гэж мэдээлэл хүргэж байгаа нь энэ.

 Б.Сараа.

Zindaa.mn-Үндэсний чөлөөт мэдээллийн шилдэг портал