“Орон сууц экспо-2011” эхэллээ

“Орон сууц экспо-2011” өнөөдөр эхэлнэ. Энэхүү үзэсгэлэн худалдаа МҮЭСТО-д гурван өдрийн турш үргэлжлэх юм. Үзэсгэлэн худалдааны үеэр орон сууцны компаниуд шинээр баригдаж буй барилгууддаа хөнгөлөлттэй нөхцлөөр захиалга авч, “Шинэ гэр” залуусын хорооллын загвар байрыг танилцуулах юм байна. Мөн орон сууц сонгох, зээлээр авахдаа иргэд юуг анхаарах вэ зэрэг хүн бүрийн өмнө тулгардаг түгээмэл асуудлыг шийдвэрлэхэд зориулсан семинар болох аж. “Координат” төвийн судалгаагаар энэ онд Улаанбаатар хотын хэмжээнд 22400 айлын орон сууц баригдаж байгаа аж. Үүний 30 хувийнх нь барилгын ажлын явц 30-40 хувьтай, 50 орчим хувь нь 80-90 хувийн гүйцэтгэлтэй байна. Өөрөөр хэлбэл, 22400 орон сууцны 50 хувь буюу 10 орчим мянган айлын орон сууц энэ ондоо багтаж бүрэн ашиглалтад орох юм. Харин зах зээлд байгаа нийт орон сууцны нэг м.кв-ын ханшийг сонирхуулахад зургаан хувь нь нэг сая төгрөгөөс доош, 10 хувь нь хоёр сая төгрөгөөс дээш, 30 хувь нь 14-20 сая төгрөгийн үнэтэй байна.

Эх сурвалж: Өглөөний сонин