Сонгинохайрхан дүүрэгт 700 иргэнд 0.7 га газар олгоно

Монгол Улсын иргэн бүрт гэр бүлийн хэрэгцээнд зориулан үнэ төлбөргүй 0.7 га газрыг олгож байгаа. Одоогоор Чингэлтэй, Баянгол дүүрэгт газар олгохгүй байгаа бөгөөд нийслэлийн захын дүүргүүдэд газар олгож байгаа юм. Харин энэ удаад Сонгинохайрхан дүүрэгт иргэн бүрт газар олгохоор болжээ. Энэ талаар тус дүүргийн газрын албаны мэргэжилтэн Л.Уранчимэгээс тодрууллаа.
-Сонгинохайрхан дүүрэгт иргэдийн гэр бүлийн хэрэгцээнд зориулж 0.7 га газар олгохоор болсон байна. Хаана газар олгохоор болсон юм бэ?
-Монгол Улсын иргэн бүрт гэр бүлийн хэрэгцээнд зориулж 0.7 га газрыг олгож байгаа. Энэ удаад Сонгинохайрхан дүүрэгт 0.7 га газрыг олгохоор болсон. Төлөвлөлтөөр тус дүүргийн 21 дүгээр хороо буюу хуучин Партизаны сангийн аж ахуйн хойд талын “Эмгэнтийн ам” гэдэг газарт иргэдэд газар олгохоор болсон.
-Газар хүссэн иргэд хэзээ, хаана, хэнд хандаж өргөдлөө өгөх вэ?
-Өргөдөл авах хугацааг албан ёсоор хэвлэл мэдээллээр зарлах болно. Ер нь иргэдийн дунд газар авах, хэрэгцээ шаардлага маш их байгаа учраас өргөдлийг ил тод, нээлттэй авна. Тиймээс хэвлэл мэдээллээр зарлана. Өөрөөр хэлбэл, энэ долоо хоногтоо багтааж өргөдлөө авна.
-Сонгинохайрхан дүүргийн иргэдийн өргөдлийг түлхүү авах уу. Эсвэл Улаанбаатар хотын иргэн бүрийн өргөдлийг авах уу?
-Заавал Сонгинохайрхан дүүргийн иргэд гэхгүй Улаанбаатар хотын иргэн бүрийн өргөдлийг авна.
-Хичнээн иргэнд газар олгох бол?
-Төлөвлөгөөгөөр 700 айлд 0.7 га газар олгоно. Өөрөөр хэлбэл, 700 хүний өргөдөл авна гэсэн үг. Угаасаа төлөвлөсөн газрын маань нөөц ийм байгаа учраас дээрх тоог тогтоож өгсөн.
-Өргөдөл өгөх иргэд ямар бичиг баримтыг бүрдүүлж очих ёстой юм бол?
-Иргэний үнэмлэхний нотариатаар батлуулсан хуулбар, байнгын оршин суугаа харьяаллын анхан шатны Засаг даргын тодорхойлолт хэрэгтэй. Иргэдийн хувьд дээрх бичиг баримтын хамт манай дүүргийн Газрын албанд товлосон өдөр нь ирж өргөдлөө өгөх хэрэгтэй.
-Сүүлийн үед иргэд газар авсан ч дэд бүтэц тааруу гэсэн шалтгаанаар уг газраа ашиглахгүй хаях болсон. Одоо олгох газрын дэд бүтэц болон Улаанбаатар хотоос хэчнээн км газарт байрладаг вэ?
-Улаанбаатар хотоос ойролцоогоор 50 км. Нэгэнт төлөвлөлтөөр олгож байгаа газар учраас дэд бүтцийг шийднэ. Яг одоо газар олголт хийх газар дэд бүтэц бэлэн биш. Харин иргэдэд газар олголт хийгээд албан ёсоор суурьшил эхлэх үед дэд бүтцийн асуудлыг шийднэ. Төлөвлөлтөд орсон байгаа.

Эх сурвалж: Монголын мэдээ