“Монгол залуу хүн-2020” Үндэсний фэйсбүүк форумд 10,000 залуу оролцлоо

Ардчилсан намын залуучуудын байгууллага болох Ардчилсан Залуучуудын Холбооноос санаачлан хэрэгжүүлж буй “Монгол залуу хүн-2020” хөгжлийн хөтөлбөрийн хүрээнд тус холбооноос залуучуудын үзэл бодлоо, мэдлэг, мэдээллээ хуваалцдаг хамгийн том талбар болсон Facebook сүлжээг ашиглан Монголд анх удаа “Монгол залуу хүн-2020” үндэсний фэйсбүүк форумыг амжилттай зохион байгуулжээ.

Дэлхийн нийт 800 гаруй сая хүнийг өөртөө нэгтгэсэн интернэтийн хамгийн том сүлжээ болох Facebook-д өнөөдрийн байдлаар Монголын 240 орчим мянган хүн нэгдээд байгаагийн дийлэнх хувь нь залуучууд байгаа юм. Иймээс Ардчилсан Залуучуудын Холбооноос орчин үеийн дэвшилтэт технологи болох Facebook сүлжээг ашиглан “Монгол залуу хүн-2020” хөгжлийн хөтөлбөрт залуучуудын санал, санаачлагуудыг тусган ажиллах зорилгоор уг фэйсбүүк форумыг зохион байгуулсан бөгөөд “Амьдралын боловсролтой Монгол залуу хүн”, “Ажилтай, орлоготой Монгол залуу хүн”, “Архигүй Монгол залуу хүн”, “Авьяас, чадвартай Монгол залуу хүн”, “Авлигагүй Монгол залуу хүн” гэсэн сэдвүүдээр онлайн хэлэлцүүлэг явагдсан байна.

Форумд давхардсан тоогоор 10.000 гаруй, хамгийн их хандсан үедээ 3.000 орчим залуучууд онлайнаар оролцсон бөгөөд зөвхөн хурлын танхимд цөөн тооны хязгаарлагдмал хүнийг хамардаг хэлэлцүүлгийн уламжлалт аргаас татгалзаж, орчин үеийн дэвшилтэт технологийн хүрээнд ямарваа нэгэн орон зай хамаарахгүйгээр олон мянган залуучуудыг хамруулж, тэдэнтэй санал бодлоо харилцан солилцож чадсанаар уг фэйсбүүк форум нь өндөр ач холбогдолтой арга хэмжээ боллоо хэмээн тус холбооныхон дүгнэж байлаа.

Өчигдөр болсон тус форумд АН-ын Ерөнхий нарийн бичгийн дарга Д.Эрдэнэбат, АЗХ-ны Ерөнхийлөгч, Гадаад харилцааны дэд сайд Б.Болор, АЗХ-ны Дэд Ерөнхийлөгч Д.Бадарсан, АЗХ-ны Удирдлагын зөвлөлийн гишүүн М.Амгаланбаатар, З.Энхболд, АЗХ-ны Ерөнхий нарийн бичгийн дарга Б.Бямбадорж, Нийслэлийн АЗХ-ны Дэд Тэргүүн Б.Батцэнгэл /Quiza/, СХД-ийн АЗХ-ны дарга Н.Дашдаваа нар оролцож, залуучуудтай онлайнаар санал бодлоо солилцсон юм.

Форумд АНУ, Европын орнууд зэрэг гадаадын улс орнуудад сурч, ажиллаж, амьдарч буй олон зуун залуучууд идэвхтэй оролцож, өөрсдийн үзэл бодлоо Ардчилсан нам, Ардчилсан Залуучуудын Холбооны удирдлагуудтай хуваалцсан нь онцлог үйл явдал болсон бөгөөд форумын үеэр залуучуудаас гаргасан санал, санаачлагуудыг “Монгол залуу хүн-2020” хөгжлийн хөтөлбөрт тусган ажиллах болно гэдгээ энэ үеэр АЗХ-ны удирдлагууд илэрхийлсэн байна.

Цаашид тус холбооноос уг Facebook форумыг тогтмол зохион байгуулах бөгөөд Twitter зэрэг бусад олон нийтийн сүлжээг ашиглан мөн хөгжлийн хэлэлцүүлгүүдийг зохион байгуулах ажээ.