Монголын бизнес эрхлэгчдийн шинэ эрин эхэллээ

Монгол улсад шинээр бизнес санаачлагч болон эрхэлж буй бизнесээ сайжруулах, хөгжүүлэх хүсэлтэй иргэдэд оюуны дэмжлэг үзүүлж, инновациар тэргүүлэгч эдийн засгийг босгох ур чадвар, алсын хараатай шинэ залуу үеийн бизнес эрхлэгчдийг бизнесийн давалгаанд уриалах зорилготой “Global Entrepreneurship Week – Mongolia” долоо хоногийн аян 11 дүгээр сарын 14-20-ны хооронд Монголд анх удаа өрнөх гэж байна.

Энэхүү дэлхий нийтийг хамарсан долоо хоног нь олон мянган үйл ажиллагаануудаар дамжуулан шинэ үеийн бизнес санаачлагчдыг бизнесийн оргилд хүрэх хүсэл тэмүүлэлд хөтөлж, илүү ихийг бүтээж санаачлахад туслалцаа дэмжлэг үзүүлж, уриалдаг өндөр үр нөлөө бүхий олон нийтийн аян юм.

Монгол улсад бизнесийн орчин сайжирч, шинэ төрлийн бизнесүүд төрөн гарч ирж байгаа хэдий ч залуу үеийн бизнес эрхлэгчид, тэр дундаа технологи, инновацид суурилсан бизнес эрхлэхэд мэдлэгийн, менежментийн болоод санхүүгийн таатай нөхцөл хараахан бүрдэж амжаагүйгээс үүдэн амжилтанд хүрэх зам нь тэр болгон гэрэлтэй байдаггүй.

Шинэ Эхлэх Цэг ТББ-н санаачилгаар зохион байгууллагдаж байгаа энэхүү аянд Монголын олон зуун авьяаслаг, ур чадвартай бизнес эрхлэгч, санаачлагч залуус нэгдэж эхлээд байгаа бөгөөд мэдлэг чадвараа хөдөлмөрийн зах зээл дээр сориод зогсохгүй өөрсдийн бизнесийн санаагаар дамжуулан нийгмийн асуудлуудад бодит, үр дүнтэй шийдлийг санал болгохыг эрмэлзэж байна.

Долоо хоног үргэлжлэх энэхүү аянд бизнес санаа тээн яваа иргэдэд үнэгүй сургалт, зөвлөгөө өгөх, мөн санхүүгийн байгууллага, хөрөнгө оруулагчидтай холбож өгөх замаар ирээдүйн бизнесийн үйл ажиллагаанд нь дэмжлэг болох зорилготойгоор дараах арга хэмжүүдийг зохион байгуулах юм.

• Олон нийтийн уриалга гаргах хэвлэл мэдээллийн өдөр

• “Silicon Valley Монголд” лекцийн цуврал

• “Бизнес сэтгэлгээнд суралцахуй” – хүүхэд залуучуудын лекц

• Залуу бизнес эрхлэгчдийн чөлөөт уулзалт

• Startup Weekend Mongolia III

• “Car pool pitch” – ТВ нэвтрүүлэг

• “Code for Mongolia” – Шилдэг IT шийдлийн уралдаан

•  Бизнес санааны булан

• Young Professionals Cocktail Night

Залуучуудын санаачилгаар хэрэгжих энэхүү үйл ажиллагааны ерөнхий ивээн тэтгэгчээр үндэсний томоохон компаниуд болох Хас Банк, Оюу Толгой, Unitel, АПУ оролцож байгаа бөгөөд ITPARK, MҮХАҮТ-н дэргэдэх Залуу Бизнес Эрхлэгчдийн Клуб, Монголын Репат Лидерүүдийн Клуб зэрэг олон байгууллагууд хамтран ажиллаж байна.