Н.Номтойбаяр гишүүн “Ахмадын тэтгэвэр нэмэх” ажлын хэсгийг ахална

Ахмадын тэтгэвэр бага хувиар нэмэгдсэнд тэд сэтгэл дундуур байгаа бөгөөд тэтгэврийн нэмэгдлийн асуудлаар  Ерөнхийлөгч, УИХ-ын дарга, Засгийн газарт шаардлага хүргүүлээд байгаа юм. Харин өчигдөр ахмадын төлөөллийг УИХ дахь МАН-ын бүлгийн дэд дарга Д.Оюунхорол, УИХ-ын гишүүн Д.Лүндээжанцан, Н.Номтойбаяр, Я.Содбаатар, Б.Бат-Эрдэнэ нар хүлээн авч уулзсан юм. УИХ дахь МАН-ын бүлгийн хувьд цалин, тэтгэврийг 30 хувиар нэмэгдүүлэх шаардлагыг Засгийн газарт хүргүүлж, холбогдох таван хуулийн төслийг санаачлан хүргүүлээд байгаа. Уулзалтын үеэр өрнөсөн санал бодлыг нэгтгэсний дүнд УИХ дахь МАН-ын бүлгийн дэд дарга Д.Оюунхорол тэтгэвэр тэтгэмжийг 30 хүртэл хувиар нэмэх асуудлаар санал дүгнэлт боловсруулах үүрэг бүхий ажлын хэсэг байгуулахаар болсныг мэдэгдсэн юм. Энэхүү ажлын хэсгийг УИХ-ын гишүүн Н.Номтойбаяр хариуцан ажиллах аж. Тэрбээр өмнө нь Нийгмийн хамгаалал, Хөдөлмөрийн яамны дэд сайдаар ажиллаж байсан энэ салбартаа харьцангуй туршлагатай юм.