АН: Үндсэн хуулийн цэцийн шийдвэрийг хүлээн авах боломжгүй гэв

УИХ дахь Ардчилсан намын зөвлөл өнөөдрийн /2019-06-03/ хуралдаанаараа Үндсэн хуулийн Цэцийн 2019 оны 02 дугаар дүгнэлтийг хэлэлцсэн байна. Ингээд Үндсэн хуулийн Цэцийн дунд суудлын хуралдаанаар нэр бүхий иргэд УИХ-ын гишүүн асан Д.Гантулгыг "чөлөөлөгдөх хүсэлт"-ийг үндэслэн гаргасан шийдвэр нь хууль зөрчсөн хэмээн үзэж, Үндсэн хуулийн цэцэд хандсаныг хэлэлцэн, шийдвэрлэсэн нь хэт нэг талын байр суурийг харсан шийдвэр боллоо хэмээн Зөвлөлийн гишүүд үзжээ. "Гишүүний дархан эрхэд халдсан зүйл огт алга. Өөрийн гаргасан алдаандаа харамсаж, гэр бүл ард түмнээс уучлал хүсэн, чөлөөлөх тухай өргөдлийг УИХ-д өргөн барьснаар нийт 60 гишүүний саналтайгаар гишүүн асан Д.Гантулгын бүрэн эрхийг цуцалсан. Иймээс Үндсэн хууль зөрчсөн зүйл байхгүй. Гэтэл Хэнтий аймгийн 42-р тойргийн 17 мянган иргэдийн эрх ашгийг боогдуулж, хэт нэг талыг барьсан, санаатайгаар мушгин гуйвуулсан, захиалгат байх магадлалтай шийдвэрийг гаргалаа" хэмээн АН-ын зөвлөлөөс үзжээ.

Мөн "Үндсэн хуулийн цэцээс нөхөн сонгуульд зарцуулах 287 сая төгрөгийн зардлыг Засгийн газрын нөөц сангаас гаргах онцгой байдал үүссэн байтал гадаадын мөнгөөр сонгууль явуулах боломжгүй гэх мэт санаатайгаар мушгин гуйвуулсан дүгнэлт гаргасан. Улсын төсөв батлагдсанаас хойш гарсан гэнэтийн онцгой нөхцөл байдлыг нөөц сангаас зарцуулах эрхтэй болдог. Гэтэл Үндсэн хуулийн Цэц зориуд ийм шийдвэр гаргасан нь захиалгат улс төрийн үйл явц боллоо хэмээн үзэж, Үндсэн хуулийн цэцийн тус шийдвэрийг УИХ дахь Ардчилсан намын зөвлөл хүлээн авах боломжгүй хэмээн шийдвэрлэжээ.