ДУНДГОВЬ: Гурван суманд хулгана устгалын төхөөрөмж гардууллаа

Л.Болд | Zindaa.mn
2019 оны 11 сарын 03

Монгол Улсын Засгийн газраас хэрэгжүүлж буй малчин өрхүүд болон аймаг, сумын төвийн иргэдийн амьжиргааг дээшлүүлэн, ядуурлыг бууруулах зорилго бүхий “Зах зээл ба бэлчээрийн удирдлагын хөгжил” төслийн хүрээнд энэ сарын 1-нд Эрдэнэдалай, Сайхан-Овоо, Дэлгэрцогт сумдад нийт 23 сая төгрөгийн өртөг бүхий 60 ширхэг үлийг цөмлөгч, утагч багажийг гардуулан өглөө.

Өнгөрсөн хугацаанд төслийн хүрээнд дээрх гурван суманд иргэдийг сургалтад хамруулан, сургалтын танхим тохижуулах, мал угаалгын долоон ванн, таван гүний худгийг ашиглалтад оруулах зэрэг бизнес эрхлэлт, мал үржлийн ажлыг дэмжин 350 гаруй сая төгрөгийн хөрөнгө оруулалтыг хийгээд байна. Мөн ирэх онд 1 тэрбум 200 сая төгрөгийн хөрөнгө оруулалт хийхээр төлөвлөж байгаа ажээ.

Тус төслийг НҮБ-ын Хөдөө аж ахуйг хөгжүүлэх олон улсын сангаас санхүүжүүлж байгаа бөгөөд Дундговь аймгийн Хүнс, хөдөө аж ахуйн газраас хүсэлт тавьсны дагуу 2018 оноос эхлэн хэрэгжин, 2021 оныг дуустал үргэлжлэх юм.

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top