ЭМЯ: Амны хаалтгүй хүн нэмэгдэж байна

Шинэ төрлийн коронавирусний халдвартай холбогдуулан Эрүүл мэндийн яамнаас өдөр бүр 11:00 цагаас мэдээлэл хийж байгаа билээ. Өнөөдрийн /2020.04.24/ коронавирусний халдвар, тархалтын нөхцөл байдлын талаарх мэдээллийг хүргэж байна.

Одоогийн байдлаар дэлхийн 213 орон, нутаг дэвсгэрт 2,6 сая халдварын тохиолдол илэрсэн. 184 мянган хүн нас барж, 700 мянган хүн эдгэрсэн байна. Одоо дэлхийд нийт 1.7 сая хүн эмчлүүлж байгаа юм.

Хойд хөрш ОХУ-д сүүлийн 24 цагт 4774 тохиолдол шинээр бүртгэгдэж, нийт халдварын тохиолдол 62 мянгад хүрлээ. Нэг өдөрт 42 хүн нас барж, амиа алдагчдын тоо 555 боллоо. Москва хотод халдварын тоо буурсан ч бусад муж, хотуудад нэмэгдлээ. 

Манай улсад нийт 958 хүн ажиглалтад байна. Шинээр 32 хүн ажиглалтад орж, 291 хүн ажиглалтаас гарлаа. Сүүлийн үед амны хаалт зүүгээгүй хүний тоо нэмэгдэж байгаа тул бүх иргэдийг маск зүүхийг ЭМЯ-наас анхаарууллаа. Чех, Англи, Испани, Хятад, ОХУ-д байгаа монгол иргэд ЭМЯ-наас утсаар зөвлөгөө авсан байна.