Халуун агаар, чийгшил, нарны шууд гэрэл агаар болон аливаа төрлийн гадаргуу дээрх коронавирусийг түргэн устгадаг гэж АНУ-ын дотоодын аюулгүй байдлын яамны шинжлэх ухаан, технологийн салбар хариуцсан дэд тэргүүн Уильям Брайан мэдэгджээ. Тэрбээр Цагаан ордонд Дотоодын аюулгүй байдлын яамнаас явуулсан судалгааны дүнг танилцуулахдаа ийн мэдэгдсэн байна.

Нарны шууд гэрэл хүчтэй нөлөө үзүүлж, гадаргуу болон агаар дахь коронавирусийг устгахад хүргэдэг болохыг судалгаа харууллаа гэж Брайан онцлоод халуун, өндөр чийгшилтэй агаар мөн ийм нөлөө үзүүлдэг гэжээ.

Түүний мэдээлснээр, нарны шууд гэрэл, Цельсийн 21-24 хэмийн дулаан болон 80 хувийн чийгшилд гадаргуу дээр тогтсон вирус хоёр минутын дараа үхэж эхэлдэг байна. Нарны шууд гэрэл, 20-24 хэмийн дулаан болон 20 хувийн чийгшилд агаар дахь вирус 1.5 минутын дараа устаж эхэлдэг гэнэ. Гэхдээ үүнийг батлахын тулд нэмэлт судалгаа хэрэгтэй болохыг тэрбээр онцолжээ.

Харин Дэлхийн эрүүл мэндийн байгууллагын цахим хуудсан мэдээлснээр, нарны хэт ягаан туяа удаан хугацаанд хүний арьс, нүд, дархлааны тогтолцоонд сөргөөр нөлөөлдөг болохыг онцолсон байна. Хэт ягаан туяаны нөлөөнд арьсны хорт хавдар, нүдний болор цайх зэрэг өвчин тусах эрсдэл өндөр гэж ДЭМБ сэрэмжлүүлдэг.