Японд байнга оршин суугч монголчууд 100 мянган иэнийн тусламжаа аваарай

Японы Хууль зүйн яамнаас 4 дүгээр сарын 20-ны өдөр Япон Улсын иргэд төдийгүй тус улсад байнгын оршин суугч ангиллаар сурч, ажиллаж амьдарч буй гадаадын иргэдэд Япон Улсын Засгийн газраас хүн бүрд 100 мянган иенийн нэг удаагийн тусламж үзүүлэхээ мэдэгдэн, коронавирусний эсрэг авч хэрэгжүүлэх эдийн засгийн арга хэмжээнд зориулсан 25.7 их наяд иений төсвийн тодотголыг санал нэгтэйгээр баталсан билээ.

Тодорхой хэлбэл, Япон Улсын байнгын оршин суугчийн карттай, оршин суугаа хаягийн тодорхойлолт авсан гадаадын иргэд дээрх нэг удаагийн санхүүгийн тусламжид хамрагдах боломжтой.

Хэрхэн бүртгүүлэх вэ?

- Хот, дүүргийн захиргаанаас тухайн шалгуур хангасан гадаадын иргэдийн гэрийн хаягаар бүртгэлийн хуудас ирнэ.

- Бүртгэлийн хуудас дээр өөрийн овог нэр, банкны дансны мэдээллийг өөрийн Япон Улсын байнгын оршин суугчийн карт болон оршин суугаа хаягийн тодорхойлолтын хуулбарын хамт хавсарган харьяа хот, дүүргийн захиргаа руу шуудангаар илгээнэ.

- Гэр бүлээрээ оршин суудаг бол гэрийн аль нэг гишүүн төлөөлөн бүртгэлийг бөглөх бөгөөд гэр бүлийн бүх гишүүдэд олгогдох санхүүгийн тусламж тухайн өрхийн дансанд цугтаа шилжин орно

- Хэрэв Та Япон Улсын “My Number” карттай бол заавал бүртгэлийн хуудсыг шуудангаар ирэхийг хүлээлгүй цахимаар бүртгүүлэх боломжтой

- Хэрэв Та дээрх санхүүгийн нэг удаагийн тусламжийг авах сонирхолгүй бол бүртгэлийн хуудсыг бөглөж явуулах шаардлагагүй болно

Дээрх бүртгэл хэзээнээс эхлэхийг тухайн оршин суугаа газрын хот, дүүргийн захиргаанаас шийдэх бөгөөд бүртгэл дуусах хугацаа нь бүртгэл эхэлсэн өдрөөс хойш 3 сарын хугацаанд үргэлжлэх төлөвтэй байна.

МОНГОЛ УЛСААС ЯПОН УЛСАД СУУГАА ЭЛЧИН САЙДЫН ЯАМ