Вакцин хийлгэсэн хүмүүст илэрч буй халдварын ГОЛ ШИНЖ ТЭМДЭГ

Их Британийн судлаачид коронавирусний эсрэг вакцин хийлгээд халдвар авсан хүмүүст илэрдэг дөрвөн үндсэн шинж тэмдгийг тодруулжээ.

Коронавирусний шинж тэмдгийг тандан судлах “ZOE COVID Symptom Study” аппликэйшны мэдээллээр, хоёр тун вакцин хийлгэсэн хүмүүст толгой өвдөх, хамар шархирах, найтаах, хоолой өвдөх зэрэг дөрвөн үндсэн шинж тэмдэг илэрдэг байна.

Харин зөвхөн эхний тунгаа хийлгэсэн хүнд дээрх шинж тэмдэг дээр ханиах зовуурь нэмэгддэг байна.

Вакцин нь коронавирусний халдвараас 100 хувь хамгаалахгүй ч хүнд хэлбэрээр өвчлөх эрсдэлийг маш сайн бууруулдаг гэж судлаачид онцолжээ. Үнэрлэх чадвараа алдах, амьсгаа давчдах, халуурах зэрэг халдварын “уламжлал” болсон шинж тэмдэг вакцин хийлгэсэн хүмүүст ховор илэрч байгаа аж.