Украин нэмж 500 мянган хүнийг цэрэгт татах боломжийг судалж байна

Украины Зэвсэгт хүчин нэмж 500 мянган цэргийг дайчлах санал тавьсан тухай Украины Ерөнхийлөгч Володимир Зеленський мэдэгджээ.

Энэ бол том тоо учир илүү их мэдээлэл, үндэслэл хэрэгтэй гэж Зеленський онцолжээ. Түүний хэлснээр, дайчилгаатай зэрэгцэн хоёр жилийн турш эх орноо хамгаалан байлдаж буй эрсийг цэргээс халах асуудлыг ярих учиртай. Тэрбээр эмэгтэйчүүдийг цэрэгт татах тухай хуульд гарын үсэг зурахгүй гэж мэдэгдээд гэхдээ дайчилгаанд хамрагдах эрчүүдийн насны доод хязгаарыг 27-оос 25 болгохыг дэмжинэ гэжээ. Оростой хэлэлцээ хийх боломжийн талаар Зеленський зөвхөн Украин түншүүдийн хамтаар энх тайвны томьёог тодорхойлсны дараа, Орос энэхүү баримт бичгийг авч үзэхэд бэлэн болсны дараа энэ асуудлыг хөндөх боломжтой хэмээн онцолсон байна.