Косовогийн тусгаар тогтнолыг хүлээн зөвшөөрөх бодолгүй байна

Европт нэгдэн нягтрах үйл явцыг хурдасгахын тулд Сербийн эрх баригчид Косовогийн тусгаар тогтнолыг хүлээн зөвшөөрөх болон Оросын эсрэг хориг нэвтрүүлэх бодолгүй байна гэж Сербийн Ерөнхийлөгч Александар Вучич Европын Холбоог өргөжүүлэх асуудлаар Брюссельд хийсэн дээд хэмжээний уулзалтын дараа сэтгүүлчдэд мэдэгдсэн байна.

“Москва болон Бээжинтэй тогтоосон харилцааныхаа төлөө би өөрийгөө зөвтгөн Европын Холбооны төлөөлөгчидтэй мэтгэлцэхгүй. Хүмүүс бие биетэйгээ ярилцах ёстой. Энэ нь ч үр ашгаа өгдөг. Би Орос, Украины мөргөлдөөнд оролцдоггүй, оролцохыг ч хүсдэггүй. Би жижиг улсын жижигхэн тоглогч. Том үйл хэрэгт оролцохгүй байхыг илүүд үздэг. Хүчирхэг гүрнүүд юм уу Европын Холбоо ийм асуудалд оролцож болох юм. Сербийн жижиг боловч манай ард түмний хувьд том асуудлуудын талаар л би ярьдаг. Би ийм л зорилготой байсан. Энэ байр сууриа ч өөрчлөхгүй” гэж Сербийн удирдагч тэмдэглэжээ. Москвад хийсэн айлчлалынхаа талаар тэрбээр ярихдаа, “уг айлчлал нь эдийн засгийн тодорхой шалтгаантай байсан бөгөөд байгалийн хий нийлүүлэх гэрээний тухай болон Сербийн газрын тосны NIS компанийн нөхцөл байдлыг Оросын талтай хэлэлцэх хэрэгтэй байлаа” гэж онцолсон байна.