Н.Энхбаяр: Миний хөрөнгийг эрэн сурвалжлаад олоорой

 Өнөөдөр МАХН-аас гэнэтийн хэвлэлийн бага хурал зарлав.  Хурал эхлэх ёстой цагаасаа 25 минут хоцорч эхэлсэн бөгөөд  тус намаас мэдэгдэл гаргаснаа энэ үеэр уншиж танилцууллаа. Тус мэдэгдэл  МАН АН-ыг буруушаасан, ирэх сонгууль будлианаар дүүрэн болно гэсэн утгатай байсан юм.

Энэ бүхнийг таслан зогсоохын тулд  ХЗДХ-ийн сайд Ц.Нямдоржийг АТГ-т шалгуулж,  суудлаас нь татан буулгах ёстой гэж үзэж байгаагаа Н.Энхбаяр хэллээ. Мөн тэрээр Ц.Нямдорж сайдын хөрөнгийн талаар цухас  тоочлоо. Экс Ерөнхийлөгчийн хэлж байгаагаар Ц.Нямдорж болон түүний эхнэр хүүхэд бүгдээрээ төрийн албан хаагчид. Насаараа төрийн албан хаагч байсан түүний эхнэр, хүүхэд нь ямар ч бизнес эрхэлдэггүй атал Ц.Нямдорж хаанаас, ямар орлогоор:

1. Туул голын эрэг дээр MCS компанийн барьсан байрны 5 давхарт Алтжингийн Алтангийнхтай хөрш зэргэлдээ амьдардаг 1 сая америк долларын үнэтэй байр,
2. Чингэлтэй дүүргийн 18-р хорооны задгай буюу Билгүүн уулын энгэрт байдаг 600.000 америк долларын үнэтэй 3 давхар хаус
3.  Хоёр хүүдээ бариулж байгаа, тус бүр нь 1 сая орчим америк долларын үнэтэй 2 хаустай болсныг мэдэхийг тун ихээр хүсэж байна. Мөн дээрх хаусыг ШШБЕГ-ын хяналтанд байдаг хоригдлуудаар бариулсан, өөрийнх нь хаусыг барьж байсан нэг хоригдол унаж амь насаа алдсан, хүүхдүүдийнх нь хаусыг барьж байсан нэг хоригдол амиа хорлосон гэдгийг онцолж байлаа. Тэрээр цааш нь дээрх үл хөдлөх хөрөнгүүд нь Ц.Нямдоржийн хөрөнгийн нэг л хэсэг гэдэгт эргэлзэхгүй байгаа бөгөөд цаашид ч түүний хууль бус замаар олсон хөрөнгө, орлогыг илчлэн илрүүлэх ажлыг үргэлжлүүлэн хийх болно. Дээрх үл хөдлөх хөрөнгө нь АТГ-ын албан ёсны веб хуудсанд байрладаг төрийн өндөр албан тушаалтны хөрөнгө орлогын мэдүүлгийн жагсаалтанд байгаа Ц.Нямдоржийн мэдүүлэгт байхгүй байна гэж мэдэгдлээ.

Энэхүү мэдэгдэлтэй холбоотойгоор  МАХН-ын дарга Н.Энхбаяраас цөөн зүйл тодруулсан юм.

 - Та сая Хууль зүйн сайдын хөрөнгө орлогын талаар ярилаа. Танай гэр бүлийнхэн ямар алба хашдаг вэ. Гэр бүлийнхээ орлогын талаар ярихгүй юу?

- Миний гэр бүлийнхэн ямар ажил эрхэлдгийг  өөрөө эрэн сурвалжлаад олчих л доо. Бүх ажлаа надаар хийлгэх хэрэггүй.  Миний эхнэр Швейцарийн банкинд 1.2 тэрбум ам.доллартай. Тэрийг мэдэх үү?

-Дуулсан. Үнэн үү?  

-Дуулсан бол миний хүү өөрөө хаана, ямар сургууль төгссөн тэр журмаараа та нар өөрсдөө судлаад мэдчих за юу. Тэрнээс миний албан ёсны хөрөнгө орлогын мэдүүлэг хэвлэл мэдээлэлд гарчихсан байгаа.

-Баталгаажуулахад бэлэн үү?

-Одоо бол би чөлөөт иргэн. Тэгэхээр хөрөнгө орлогын мэдүүлгээ өгөхгүй ш дээ.

Тэрээр ингэж хэлээд  хэвлэлийн бага хурлаас гарсан юм.  

МАХН-аас гаргасан мэдэгдлийг ЭНД ДАРЖ үзнэ үү.

А.Баярмаа