Хууль бус үйлдлээрээ хүний амь авдаг ”Цаст констракшн”-ы барилгын ажлыг зогсоожээ

Сүүлийн жилүүдэд манай улсад барилгын салбар эрчимтэй хөгжиж байна. Сайны хажуугаар саар гэгчээр үүнийгээ дагаад хөдөлмөрийн аюулгүй байдал алдагдсан онц ноцтой хэргүүд их гарах болсон.

 2013 оны байдлаар нийт 39 удаагийн үйлдвэрлэлийн осол гарч түүнд 14 хүн өртөж нас барж, 18 хүн тахир дутуу болж, 9 хүн хөдөлмөрийн чадвараа түр хугацаагаар алдсан гэж Мэргэжлийн хяналтын ерөнхий газраас гаргасан тоо бий. Осолд өртөж тахир дутуу болсон иргэдийн тоо өмнөх жилээс 44.4 хувиар нэмэгдэж, хөдөлмөрийн чадвараа түр хугацаагаар алдсан иргэдийн тоо 73.5 хувиар буурсан байна.

Харин 2014 он гарсаар барилгын салбарт хүний амь нас үрэгдсэн 5 осол гараад байгаа юм. Он гараад хоёр гуравхан сарын нүүр үзэж байхад бүхэл бүтэн таван хүний эрдэнэт амь нас үрэгдэнэ гэдэг чинь юу гэсэн үг вэ. Ил гарсан тоо энэ болохоос бус үүний цаана бүртгэгдээгүй олон осол аваар дарагдсаныг хэн ч мэдэхгүй.

Мөн МХЕГ баригдаж байгаа барилгуудад хяналт шалгалт хийж, зөрчил дутагдлыг арилгуулж, зарим компанийн барилгын үйл ажиллагааг түр зогсоосон байна. Үүний нэгдүгээрт хууль бус үйлдэл, хүний амь авдгаараа алдартай “Цаст констракшн” байна.

"Цаст"-ынхан барилгын ажил гүйцэтгэх явцдаа "Монгол эм импекс" компанийн агуулахын барилгад гэмтэл учруулсан, барилгын зураг төсөв батлагдаагүй, угсралтын ажил эрхлэх зөвшөөрөл олгоогүй байхад ажлаа эхэлсэн гэсэн шалтгаанаар үйл ажиллагаагаа зогсоохыг удаа дараа шаардсан ч ажлаа үргэлжлүүлсээр өнөөг хүрсэн байна.

Тухайн үед газар эзэмших зөвшөөрлийг цуцалж, үйл ажиллагааг нь зогсоосон ч “Цаст констракшн” үйл ажиллагаагаа үргэжлүүлсээр л байсан аж.

“Цаст констракшн” компанийн барилгаас үүдсэн осол, зөвшөөрөлгүй барилга барьсан асуудал олон давтагдаж байгаа. Гэтэл энэ компанийнханд хууль үйлчилдэггүй. Холбогдох байгууллагынхны үгийг ч тоодоггүй. Иймэрхүү дураараа аашилсан,  эрх мэдэл, хөрөнгө мөнгөндөө эрдсэн хүний амийг үнэгүйд тооцдог. Увиагүй нөхдүүдэд төр төмөр нүүрээ харуулах цаг нэгэнт болжээ.

Н.Ганаа