Нийслэлчүүд хоёрхон жилийн дотор усны хомсдолд орно

Туул голын ай савд Монгол Улсын хүн амын 42 хувь амьдардаг аж. Өөрөөр хэлбэл, 1.2 сая хүн Туул голын орчим амьдарч, уснаас нь ууж байгаа гэсэн үг. Харамсалтай нь гэм­гүйхэн уудаггүй гэд­гийг мэр­гэжилтнүүдийн  судал­гаа­наас харлаа.

Судлаачдын  хэлснээр, Туул голын эрэг, хязгаар­лалтын бүсэд үйл ажиллагаа явуулдаг үйлдвэр, аж ахуйн нэгж, компани дэндүү ол­ширчээ. Тэд их хэмжээгээр ус ашигладаг бөгөөд үүний улмаас Туул голын усны горим, чанарт хэт их сөрөг өөрчлөлт гарсан байна. Тухайлбал, голын ус­ны түвшин сүүлийн 10 жи­лийн дотор нэг метр гаруй доошилсон. Мөн Туулын усны ундаргад нөлөө үзүүл­дэг Сэлбэ, Улиастай, Түргэн, Гачуурт, Хуандайн гол адагтаа тасарч, хуурай сайр болсон.

БОНХЯ-ны “Усны нэгд­сэн менежмент”-ийн та­нил­­цуулгад Улаанбаатар хо­тын гүний усны нөөц 330 мянган шоо метр/хо­ног бол­сон аж. Үүнийг одоо­гийн хэрэг­лээтэй холбон тоо­­цоолоход 2014-2015 он гэхэд нийслэл гүний усны гачигдалд орох нь тодорхой болжээ.

Улаанбаатар хотын хүн амын усны хэрэглээ жилд 302.8 мянган шоо метр/хоногт хүрээд байгаа бөгөөд таван жилийн дараа энэ хэмжээ 60 мянга орчим шоо метр/хоногоор нэмэгдэх юм байна. Тодруулбал, жил га­руйх­­ны дараагаас нийс­лэл­чүүд хүссэн хүсээгүй бохир­дуул­сан Туул голын­хоо усыг уухаас өөр сонголт­гүй болж эхэлнэ гэсэн үг. Гэтэл лабораторийн шинжил­гээ­гээр Туул голын усанд хү­чил, шүлт, нефтийн бүтээг­дэхүүн, давс, пестицид, хүнд металл агуулагдаж бай­гааг тогтоожээ. Эдгээр нь өвчин үүсгэхээс гадна амь насанд аюул  учруулахуйц хөнөөлтэй бодис юм.