Ц.Анандбазар Д.Дорлигжавтай найз, эсвэл Д.Чинзориг жинхэнэ бойкотлогч

“Сод Монгол”-ын экс болон эдүгээгийн эздийг тойрсон дуулиан сүүлийн үеийн сэнсааци болов бололтой. Хэн хэнийгээ хэвлэлийн хуудсаар муулж, өөлөх тэдний хэн нь буруутайг хууль хяналтынхан тогтооно. Эсвэл цаг хугацаа үнэнийг нь ил гаргаад ирнэ. Тэгвэл Ц.Анандбазар болон Д.Чинзориг гэж чухам яг хэн бэ.

Ц.Анандбазар

Өрсөлдөгч нь түүнийг хамгийн сүүлд телевиз, сонинуудтай “хаалтын гэрээ” гээчийг байгуулж, үнэн мөнийг дарлаа гэж хурцаар шүүмжиллээ. Гэрээг 28-наас үзэглэж эхэлсэн ба нэг байгууллагатай л гэхэд 5-10 сая төгрөгийн гэрээ байгуулсан гэнэ.

Д.Чинзоригийн хэлж буйгаар, Ц.Анандбазар үнэнээс айгаагүй л бол ийм үйлдэл хийхгүй байсан аж.

“Сод Монгол”-оор овоглуулсан Анандбазар хэмээн энэ эрхмийн нэр хаа нэгтэй, хааяахан базаахгүйгээр сонсогддог ч энэ удаагийнх шиг барим тавим байсан нь үгүй. Түүнийг одоогоор энэ компанийн хуучин захирал Д.Чинзоригт хоёр тэрбум гаруй төгрөгийн хохирол учруулсан гээд байгаа.

Нарийн явдлыг хэвлэлээр бичсэнээр нь харвал, Д.Чинзориг 2000 оны үед Ц.Анандбазарт шатахуун зээлээр өгдөг байжээ. Чухам яг ямар гэрээ байгуулж хийсэн ажил гэдгийг аль аль тал нь мэдээлээгүй байгаа ч Ц.Анандбазар “Сод Монгол групп”-ийг байгуулсан нь хууль бус гэж нөгөө тал тайлбарлаж байгаа юм.

Хамгийн гол нь, Д.Чинзоригийн нэхэмжлэл өөрийнх нь бусдаас авах өрийг мань нөхөр хуурамч бичиг баримтаар өөрийн болгож авсан аж. Үүнийг залилан гэж үзсэн Д.Чинзориг Ц.Анандбазарыг шүүхэд өгч, улмаар анхан шатны хурлаар түүнийг буруутай гэж тогтоосон. Харин давж заалдах шатны шүүх хурал Анандбазарыг буруугүй гэж үзжээ.

Одоо хэвлэлээр Ц.Анандбазарыг Н.Энхбаярын гар хөл байсан учир өдий дайны амжилттай яваа гэж бичиж байна. Гурав дахь Ерөнхийлөгчийн хүн гэгддэг Д.Дорлигжавын туслах Б.Бат-Орших энэ хэргийг шууд өөр дээрээ татан авч Ц.Анандбазарын талд ажиллаж, түүнийг өмгөөлж эхэлсэн ч гэцгээх болов.

Тэр ч бүү хэл, зарим хэвлэлд “Ерөнхийлөгч асан Н.Энхбаяр нь Ц.Анандбазарыг дагуулан “Ханамаса” зоогийн газрын тусгай өрөөнд манай компанийн гишүүн Р.Батбаяртай уулзаад “Миний дүү Ц.Анандбазар нь танай компанид өртэй юм байна. Одоохондоо чимээгүй байж байгаач, энэ сонгуулиар манай нам ялна. Би чамайг “НИК”-ийн захирал болгоно. Тиймээс Д.Чинзоригийг өрөө нэхэхгүй байх талаас нь яриарай”” гэж бичжээ.

Өөрөөр хэлбэл, энэ хэрэгт Д.Дорлигжавын туслах оролцож байгаа учраас Ц.Анандбазар ямар нэг ял зэмгүй өнгөрнө гэж мөрийцөж эхлэв. Дээрх яриа үнэн бол ч байдал эвтэй биш л гэсэн үг дээ. Ёстой л цаг хугацаа харуулах байх.

Д.Чинзориг

Энэ хүний талаар олон нийт тийм ч их зүйл мэдэхгүй. Харин нэг л өдөр гадуур “Ц.Анандбазарыг бойкотлогч” нэрээр яригдах болсон. Түүнийг хэвлэлийн хурал хийсний дараахан “Сод Монгол”-оос тайлбар хийж “Д.Чинзориг ямар шалтгаанаар удаа дараа ингэж хурал зохион байгуулаад байгааг ойлгохгүй байна. Энэ асуудал аль хэдийн хууль, шүүхээр яваад дууссан. Бид маргааш албан ёсны мэдээлэл хийж, холбогдох баримт сэлтийг үзүүлэх болно” гэсэн.

Шүүхээс бүх хэргийн үнэн мөнийг тогтоосон гээд байгаа ч чигээрээ зүтгэсээр байгаа энэ хүнийг зарим хэвлэлд мөнгө саах гэж байна гэж бичих болов. Тэрбээр бас энэ хэргээс болж Нийслэлийн прокурор асан Ш.Сүхбатыг ажлаас халсан талаар ярьж, үүний цаана Ц.Анандбазар байгаа гэсэн.

Харин Ш.Сүхбат энэ талаар мэдэгдэл хийж “Тийм зүлй огт байхгүй. 2010 онд Д.Чинзоригийн гомдлоор энэ хэргийг хянаж байсан. Гомдолд дурдсан зарим нэмж шалгуулахаар шинээр илэрсэн нөхцөл байдлаар хэргийн ажиллагаа үүсгэн даалгавар бичиж шалгуулсан боловч, тухайн хэрэгт шинээр илэрсэн нөхцөл байдал тогтоогдоогүй учраас хэргийн ажиллагааг зогсоосон юм. Иргэн Д.Чинзориг нь бусдыг залилан мэхэлсэн болон мөрдөн байцаалтаас оргон зайлсхийсэн хэргээр 2008 онд шүүхээр, жил зургаан сарын хорих ял шийтгүүлж, уг ялаа эдэлж гарч ирээд гомдол гаргаж заргалдсан байдаг” гэжээ. Эндээс харахад мань эр нээрээ бойкотлох гээд ч байх шиг. Эсвэл мөнгөний сүрэнд дарагдчих гээд ч байх шиг.

Хэн нь худалч вэ

Энэ хоёр эрхмийн хэрэг яаж шийдэгдэх бол. Нээрэн прокурор, цагдаа, шүүхгүй Ц.Анандбазарын талд орсон бол яаж шийдэгдэх нь тодорхой. Үгүй бол, Д.Чинзориг томоохон сэнсааци дэгдээж мөнгө салгах гэж байгаа гэдэг нь үнэн. Ямар ч байсан хууль хяналтынхан ажиллаадахаг. Бас тэгээд цаг хугацаа хэнийх нь үнэн гэдгийг ялгах байх даа.

Д.Маргад