Ардчилсан нам авлигачдаасаа салж байж шинэчлэгдэнэ

  Ардчилсан намаас нэр бүхий улс төрчид салан тусгаарлаж, шинэ нам байгуулах тухай мессеж өнгөрсөн долоо хоногт “нисэв”. Г.Батхүү, Л.Болд, Х.Тэмүүжин, Ц.Оюунгэрэл, М.Батчимэг нар нам байгуулах гэж байна гэсэн таамаг гарлаа.  Хоёр жилийн өмнө Монголын ардчилсан нэгдэл буюу МоАН санаачлага гэх шинэ фракцыг Г.Батхүү, Л.Болд, А.Бакей, Ш.Түвдэндорж тэргүүтэй нөхөд байгуулж улс төрийн үйл ажиллагаа явуулах болсон билээ. Намын даргын өрсөлдөөнд хүчтэй оролцохын тулд энэ оны эхээр тэдэн дээр “Нэг ардчилал” клубынхэн нэгдсэн. Тэгэхээр хоёр клуб (фракц)-ын нэгдэл, тэдний зүгээс шинэ нам байгуулах тухай сураг дуулдаж байна.

 “Шонхор”, МоАХ, “Алтангадас”-ынхан нэг талдаа гарч эвлэлдэн нэгдсэн учраас нөгөөдүүлийнх нь хувьд АН дахь байр суурь нь тун бүрхэг бий. “Шонхор”-ынхон намын дарга, апрадыг бүхлээр нь удирдаж, МоАХ-оос Ерөнхийлөгч сонгогдсон. “Алтангадас” фракцийн тэргүүн Н.Алтанхуяг Ерөнхийлөгчийн зөвлөхөөр очсоноос үзэхэд “Шонхор”, МоАХ-ынхантай “Алтангадас” нь нэгдмэл байр суурьтай болжээ гэж ойлгож болно. Тэгэхээр энэ гурав (МоАХ, “Шонхор”,  “Алтангадас”) хүчирхэг нэгдлийг бий болгож МоАН, “Нэг ардчилал”-ынхан намын бодлогын гадна талд үлдэх болсон юм. Намын удирдлага, зохион байгуулалт, дотоод сонгуулийн үйл явцыг шүүмжилж ирсэн хүмүүс нь МоАН, “Нэг ардчилал” клубынхан. Намын дарга С.Эрдэнийн “азаргалсан” бодлогыг намынх нь зарим нь тэвчдэггүй.  Л.Болд, Ц.Оюунгэрэл, Х.Тэмүүжин, М.Батчимэг зэрэг дунд үеийнхэн намын удирдлагаа өнгөрсөн жил гаруй хугацаанд их бага хэмжээгээр шүүмжилж ирлээ.  

Ингэж “шоовдорлогдож” байгаа учраас шинэ нам байгуулахыг эрмэлзэж байхыг үгүйсгэхгүй. Харин тэдний ард хүч өгч буй хүн нь Ц.Элбэгдоржийг байгаа гэх. Ц.Оюунгэрэл, Х.Тэмүүжин, М.Батчимэг гээд түүний улс төрд хөтлөн оруулсан залуучуудыг нам байгуулах нь гэсэн мэдээлэл гарсан учраас ингэж таамагласан байхыг үгүйсгэхгүй. Мэдлэг боловсролтой Л.Гантөмөр, М.Батчимэг, Л.Болд зэрэг төрд, намд ч хэрэгтэй залуучууд АН-аас зайгаа баривал халгаатай явдал болно. АН хоёр хуваагдсан юм шиг харагдана.

Харин авлига, хөрөнгө мөнгө завшсан, уул уурхайн бизнест холилдсон нөхдөөс намаа орхих нь АН-д ашигтай. Үнэхээр АН-аас Ц.Элбэгдорж тэргүүтэй нөхдүүд гарвал сайн ч байж мэдэх билээ. УИХ-ын чуулганы индрээс “Эрдэнэт” үйлдвэрийн 49 хувийг төрд эргүүлэн авсан асуудлыг шүүмжилж, улаан нүүрээрээ хамгаалж, ичгүүр сонжуургүй ханддаг. “Эрдэнэт”-ийн 49 хувийг элгээрээ хамгаалдаг Ц.Элбэгдоржийн увайгүй үйлдлийг Монголын ард түмэн жигшсэн. АН авлигачдаас салж байж шинэчлэгдэнэ. Энэ утгаараа Ц.Элбэгдорж АН-д хэрэггүй нэгэн. Авлига, уул уурхай, эдийн засгийн хууль бус бизнест оролцсон хүмүүсээс АН салж байж шинэчлэлийн үйл явцад эерэгээр нөлөөлөх ёстой. Оюутолгойн гэрээг Монголын ард түмний талд ашиггүй байгуулсан С.Баярцогт, Ч.Сайханбилэг нараас АН салах нь намд л ашигтай.

Тийм учраас Ц.Элбэгдорж, түүнийг дагаад С.Баярцогт, Ч.Сайханбилэг нарын нөхдүүд АН-аас гарах нь тус намд муу зүйл биш. Одоо үед улс орон, төр засаг, улс төрийн намууд авлигачдаасаа салах нь юу юунаас чухал байна. Авлига авсан, хөрөнгө мөнгө завшсан нөхдүүдээс салж чадсан нам л шинэчлэлийн эхлэл болно. Ард түмнээс ч оноо авч чадна.

Т.Түвшин

ZINDAA.MN