УИХ дахь МАН-ын бүлгийн дарга Д.Хаянхярваагаас дараах тодруулгыг авлаа.
-УИХ-ын хаврын чуулган жагсаал цуглаантай зэрэгцэн эхэллээ. УИХ-ыг муу ажиллалаа гэж үзэн тарахыг шаардан жагсаж байна. Та УИХ-ын гишүүний хувьд энэхүү жагсаалын шаардлагыг хэрхэн харж байна вэ?
-Сүүлийн үед улс төрийн намуудын нэр хүнд их унаж байна. Үүнтэй холбогдуулан иргэд янз бүрийн байдлаар санал бодлоо илэрхийлж байна. Мэдээж үзэл бодлоо илэрхийлэх эрх нь чөлөөтэй байгаа. УИХ-ын хувьд өнөөдөр хангалтгүй муу ажиллаад, ажил үүргээ гүйцэтгэж чадахгүй болчихсон хэмжээнд хүрээгүй гэж ойлгож байна. Төрийн ажил хэвийн үргэлжилж байна. Мэдээж засч залруулах асуудал бий юу гэвэл бий. Ялангуяа УИХ-ын гишүүдийн ёс зүй, хариуцлага, сахилга батын асуудалд анхаарлаа хандуулж ажиллах шаардлага байгаа.
-УИХ-ын хаврын чуулганаар хэлэлцэх асуудлын нэг нь Үндсэн хуульд нэмэлт өөрчлөлт оруулах хуулийн төсөл багтаж байгаа. Энэ асуудлыг бүлгийн хурлаар хэзээ авч хэлэлцэх вэ?
-Бүлгийн хурлаар ойрын үед авч хэлэлцэнэ. Үндсэн хуульд нэмэлт өөрчлөлт оруулах шаардлагатай гэж үзвэл ес, аравдугаар сарын дундуур ард нийтийн дунд санал асуулга явуулах чиглэлээр Үндсэн хуулийн өөрчлөлтийг бэлдэж байгаа.
-Жаст групп” ХХК-ийн захирал Ш.Батхүү өнөөдөр Стандарт банкны зээлийн асуудлаар захидал бичсэн байна. "Эрдэнэт" үйлдвэр давж заалдах боломжгүй гэсэн асуудлыг захидалдаа хөндсөн байсан. Энэ асуудалд та байр сууриа илэрхийлнэ үү?
-Тодорхой хэлэх хариулт алга. Хууль хяналтын байгууллага нь шалгаж асуудлыг нэг талд нь гаргах ёстой.
-УИХ-ын гишүүн Д.Гантулга өмнө нь бүрэн эрхээсээ татгалзаад шалгуулъя гэж бүлэг дээрээ ярьж, санал тавьж байсан гэдэг нь үнэн үү?
-Өмнө нь ийм асуудал яригдаагүй. Маргааш бүлгээр авч хэлэлцэнэ.
Ш.Адъяамаа
Сэтгэгдэл ( 0 )