"Монгол Улсын худалдан авах чадвар Умард Солонгосын дөнгөж өмнө байна"

Монгол Улсын Үндсэн хуульд оруулах нэмэлт, өөрчлөлтийг УИХ-ын чуулганы нэгдсэн хуралдаанаар хэлэлцэж байна.  Хуралдааны үеэр УИХ-ын гишүүн Б.Бат-Эрдэнэ “Шинэ Үндсэн хуулийг анх баталснаас хойш улс орны нөхцөл байдал яагаад ийм байдалд хүрчихэв. Умард Солонгосын дөнгөж өмнө худалдан авах чадвараараа эрэмбэлэгдэж байна. Үндсэн хуулийн суурь зарчмууд үндсэндээ ганхчихсан. Монгол улсын бүрэн эрхт байдал, төрийн байгуулалтын засаглалын тогтолцоо, Үндсэн хуулийн Цэцтэй холбоотой асуудалд хүртэл яригдаж байна. Энэ бүхнийг уг шалтгаанаас нь хөөмөөр байна. Ёс зүй, зан заншлын хэм хэмжээгээр шийдэх олон асуудал бий. Өнөөдөр Монгол Улсад хэрэгжүүлдэгсэн бол 600 гаруй хууль байна” хэмээн үг хэлэв.

Үүнд ажлын хэсгийн гишүүн Ц.Товуусүрэн “Үндсэн хуулийг баталж байхдаа сайн сайхан зүйл бодож байснаас биш ийм байдалд орно гэж бодож байгаагүй нь үнэн. Олон асуудлыг Үндсэн хуулийн хүрээнд зөв голдирлоор нь шийдээд явж болох байсан. Гэхдээ 2000 онд хийсэн өөрчлөлт суурь ойлголтод ямар нэгэн гажиг үүсгэсэн нь ойлгомжтой болсон. Сүүлийн гурван парламент дамжиж энэ гэмтлийг засах оролдлого хийсэн. Цаашид сайн явахын тулд суурьдаа гарсан гэмтлийг засч байж явах нь зөв. Засгийн газар тогтвортой ажиллах, давхар дээлийг хязгаарлах санал санаачлага бол нийт ард түмнийх гэдэгт эргэлзэхгүй байна” хэмээн хариулав.

Чуулганы хуралдаан үргэлжилж байна.