Ц.Гарамжав: Хөдөлмөр эрхлэлтийг цэргийн алба шиг албажуулмаар байна

Монгол Улсын Үндсэн хуульд оруулах нэмэлт, өөрчлөлтийг УИХ-ын чуулганы нэгдсэн хуралдаанаар хэлэлцэж байна.  

Хуралдааны үеэр УИХ-ын гишүүн Ц.Гарамжав “Үндсэн хуулийн нэмэлт, өөрчлөлтийн төсөлд эдийн засгийн эрх үүргүүдийг байгалийн баялгийг тэгш хуваарилах зарчмыг зургаадугаар зүйлд хэсэгхэн тусгасан байна. Өнөөдөр манай нийгэмд тулгамдаад байгаа асуудал бол өмчийн харилцааны ялгамжтай байдал. Монгол Улсын хэмжээнд 30-аад хувь нь ядуу. Үндсэн хуулийн өөрчлөлтөөр ажил хөдөлмөр эрхлэх боломжийг яаж дэмжиж өгөх вэ. Ажлын байр бий болгогчдыг яаж дэмжих вэ. Иргэн заавал хөдөлмөр эрхэлж байж нийгмийн баялгаас ахиу хүртдэг баймаар байна. Ажил хөдөлмөр эрхлэлтийг цэргийн алба шиг албажуулмаар байна. Тэгэхгүйгээр халамжаар явсан улс үндэстэн мөхдөг түүхтэй. Мөн Гүйцэтгэх засаглалын асуудалтай холбоотойгоор Монгол Улсыг эзэнтэй байна уу гэдэг яриа гарч байна. Ерөнхий сайд танхимаа томилоод, хариуцлагаа 100 хувь хүлээгээд явахаар байгааг дэмжиж байна. УИХ-ын гишүүд гүйцэтгэх засаглалд орох байдлыг хязгаарлаж байгаа нь зүйтэй" хэмээв.

УИХ-ын Төрийн байгуулалтын байнгын хорооны дарга С.Бямбацогт “Үндсэн хуулийн зургаадугаар зүйлийн 2-д таны хэлж байгаа асуудлыг тусгасан. Ард иргэдээ хөдөлмөрлүүлдэг, хөдөлмөрлөдөг хүмүүсээ дэмжих асуудлыг дэмжиж байгаа. Үүнийг дагалдах хуулиудаар зохицуулж болно. Монгол Улс хүмүүнлэг иргэний ардчилсан нийгмийг бүтээхийг зорьдог. Тиймээс зарим иргэдээ халамжлах ёстой. Эдийн засгийн өсөлтийг ард иргэдэд наах зарчим нь тогтвортой хөгжлийн ойлголтод багтана. Ажил хийж байгаа хүмүүсээ дэмжих, баялгийн тэгш хуваарилалтыг бий болгох заалтыг органик хуулиар зохицуулах боломжтой. Харин давхар дээлтэй холбоотой асуудалд гүйцэтгэх засаглал, хууль тогтоох эрх мэдлийн уялдаа холбоо алдагдаж, УИХ-аас Засгийн газар хараат болсон. Үүнийг өөрчлөхөөр дөрвөөс доошгүй гишүүн нь УИХ-ын гишүүн байж болно гэж оруулж ирсэн нь Үндсэн хуулийн гол өөрчлөлт юм” хэмээн тайлбар хийлээ.